“Ohin dader tuku 3:40, ita-nia ekipa patrulla UPF Postu Mozon halo operasaun iha área Lessu Maliana no konsege asegura sasán kulturál Timór nian, osan mean, ai-moruk inklui motorizada tipu KLX 2 ne’ebé sidadaun sira uza no tenta halo transasaun ilegál iha área fronteira. Maibé sasán hirak ne’e sei deskuñesidu tanba na’in halai tama fali ba área Indonézia no ita-nia membru sira la konsege kaptura”, dehan Komandante UPF, Superintendente Euclides Belo, liuhusi telefone, kuarta (13/07).
Tanba sasán hirak ne’e asegura ona iha kompañia Alfa, Tunubibi hafoin sei halo autu apreensaun hodi asegura iha Komandu PNTL Munisípiu Bobonaro hodi Prosesa kontinuasaun ba Ministériu Públiku.
Evidénsia ne’ebé UPF rekolla mak hanesan Belak Mean 252, Belak Mutin 94, Belak Mean Ki’ik 477, Belak Mutin Ki’ik 152, Lafa Mean 58 Lafa Mutin 24, Kaebauk 2, kelu/keke 10, Maskana 60, Morten 165, Mas Padi 19, Brinkus 124, korente mas padi 52, Mas Mean 5. Iha mós Ai-moruk balun hanesan Paramex 494 strip, supertetra 195 strip, puyer/bintang 180, Dexanltarsen Dexa 400 strip, Inza pakote 124, Konidin pakote 2046 no objeitu hirak ne’e priense ona autu apreensaun hodi asegura iha Kompaña.
Dadaun ne'e membru UPF nafatin halo vizilánsia maka’as iha fronteira hodi kontribui ba seguransa públika, nune’e bele halo prevensaun hodi garante liña fronteira sai fatin seguru ba ema hotu. (*)
