Komandante PNTL Munisípiu Dili, Superintendente Xefe Henrique da Costa hatete, atividade operasaun kalan konsege halo aprensaun ba motirizada sira ne’ebé kontra lei.

“Iha sesta no sábadu kalan ita prende motorizada hamutuk 200 iha área Metiaut, tanba viola regra lei kódigu estrada númeru 06/2003 laiha karta kondusaun, balun dokumentu laiha no la tau asesória motorizada”, dehan Henrique, iha Kna’ar fatin PNTL kaikoli, tersa (12/07).

Motorizada sira ne’e ekipa konjuntu patrollamentu prende konsege asegura iha edifísiu komandu PNTL Munisípiu Dili atu aplika multa ba infratór sira.

Tanba ne’e, evidénsia motorizada hamutuk 200, PNTL Munisípiu Dili prende, tanba sidadaun sira la kumpri regra lei kódigu estrada, laiha karta kondusaun, balun karta kondusaun mate, laiha asesória motorizada hanesan espellu, sapa matrikula, inklui balun kanu resin.

Maske PNTL Dili hasoru difikuldade, laiha karreta kamioneta boot hodi tula evidénsia sira ba edifísiu komandu PNTL Dili, maibé atividade operasaun sei la para, tanba iha loron sesta ho sábadu kalan ne’e sidadaun barak movimentu ba Kristu Rei liu hodi halai taru motorizada.

“Sidadaun sira-nia movimentu ita la limite sira, maibé sira halo viajen ba mai barak mak viola regra lei kódigu estrada nian ida-ne’e maka ita halo atuasaun inklu aktividade patrollamentu la’o ain iha tempu kalan kontinua halo atu evita krime akontese”, afirma nia.

Alende ne’e PNTL Munisipiu Dili halo patrollamentu la’o iha tempu kalan ba fatin sira ne’ebé durante sai akontese krime hanesan iha área Dom Aleixo, situasaun la di’ak, maibé iha fali área seluk hanesan Bairu Pite, área Fatuk Fransico iha Bekora joven sira provoka malu laiha insidente ida-boot.

“Agora ba oin fatin sira ne’e ita identifika ona sai fatin ba risku konflitu ita kalan sei halo operasaun la’o ain ba fatin sira atu garante nafatin seguransa ba ita-nia komunidade iha tempu kalan”, hatete nia.

Tanba ne’e, husu ba sidadaun joven mane no feto husi munisípiu mai iha kapitál Dili balun eskola no balun halo atividade negósiu evita-an atu halo problema tenke kria ambiente ida-di’ak no hakmatek iha sosiadade la’ós atu mai iha Dili halo problema.

Tuir dadus estatistika komandu PNTL husi Sesaun Polísia Tránzitu Munisípiu Dili rejista iha fulan-juñu konsege prende motorizada iha área juridiku munisípiu Dili hamutuk 191 ne’ebé viola regra lei kódigu estrada. (*)