“Atu informa katak iha oras tuku sia kalan, ita-nia membru Servisu Sekreta halo kapturasaun ba ita nia sidadaun feto nain-4 ne'ebé mak komete krime transasaun ilegál husi Atambua mai Timor-Leste ba konbustivel tipu Gazolina jerigen 20 litru (ltr) hamutuk 29 no 5ltr iha 7, no sira halo kapturasaun iha área TCL 12 Suku Batugade”, dehan Komandante Unidade Patrullamentu Fronteira (UPF), Superintendente Euclides Belo, liuhusi telefone, kuarta (13/07).
Ba sidadaun na’in-4 ne'e UPF halo ona identifikasaun no termu entrega ba Esquadra PNTL Batugade hodi halo prosesu kuntinuasaun.
“Iha prosesu identifikasaun ne'e ita identifika sidadaun feto na’in-4 ho inisiál, CM tinan 50, husi Aldeia Lotan, Suku Leohitu maibé hela iha Mota-Ain, Suku Batugade, ALP, tinan 18, husi Aldeia Leohitu, Suku Leohitu no hela iha Mota Ain. Enkuantu iha sidadaun feto na’in-rua ne’ebé halo kazamentu mista ho timoroan mak YMB, sidadaun Indonézia, tinan 31 husi Suku Dolaus, Atambua-NTT, no AV sidadaun Indonézia, tinan 31 husi Suku Salore, Atambua-NTT”, esplika nia.
Entretantu parte UPF, entrega ona sidadaun hirak ne'e hamutuk ho evidénsia ba ona Komandu Esquadra PNTL Batugade hodi kontinua ba prosesu investigasaun no sei prosesa tuir lei ne’ebé vigor iha Timor-Leste. (*)
