“Ami apresia sebisu PSIK nian durante ne’e, tanba liuhusi serbisu ne’ebé mak iha, bele detein rede krime tráfiku umanu na’in-tolu iha ita-nian rai, nune’e mós halo detensaun ba sidadaun estrajeiru na’in-rua ne’ebé sai hanesan sindikatu internasionál ba krime tráfiku umanu hafoin PSIK serbisu informasaun hosi família sira”, dehan Abel, iha nia kna’ar fatin Fundasaun Mahein Audian, kinta (07/07).

Tuir FM nian haree durante ne’e PSIK halo nia serbisu di’ak tebes  liuhusi sira-nian serbisu informsaun  PSIK nian, mesmu iha kritika no lamentasaun barak.

“Krime tráfiku umanu ne’e, krime ne’ebé ita hotu lakohi atu akontese iha ita-nia rai, piór liu krime ida-ne’e rasik envolve ita-nia ema, hodi fasilita timoroan ba servisu iha rai-liur. Maibé ho grasa maromak nian, liuhusi ita-nia servisu informasaun PSIK nian (intelejen), konsege deteta lalais de’it suspeitu ne’ebé halo transasaun ba ita-nia ema”, hatete nia.

Ba servisu informasaun PSIK nian, durante ne’e halo servisu ho di’ak, tanba ne’e bele halo detesaun ba ema hirak ne’ebé komete krime tráfiku umanu.

“Ita dala barak kestiona serbisu PSIK, maibé ami atu dehan katak, dala ida tan ami apresia sira-nia serbisu, tanba ho esforsu bele deteta detein ema hirak ne’ebé mak envolve iha krime tráfiku umanu, nu’udar meus ida prevene labele iha tan vítima seluk”, dehan nia.

Durante ne’e orgaun polisiál kriminál sira hanesan Polísia Nasionál Serbisu Investigasaun Kriminál (PNSIK), no Polísia Sientifiku Investigasaun Kriminál (PSIK), tuir de’it mandadu husi tribunál.

“Ha’u hanoin la’ós serbisu intelejensia PSK mak fraku, maibé ita haree ne’e PSIK ezekuta de’it mandadu husi tribunál atravez husi Ministériu Públiku, bainhira PSIK detein halo identifikasaun durante oras 12 ba suspeitu sira, depois halo deteinsaun suspeitu sira hodi kumpri oras 72, hodi submete arguidu sira ba Primeiru Interogatoriu’, dehan nia.

Tanba ne’e husu ba públiku, atu fó nafatin konfiansa ba orgaun polisiál sira hodi kontinua halo nia serbisu.

“Atu dehan faktu la komprova ka komprova ne’e la’ós servisu intelejénsia PSIK nian mak fraku, maibé ne’e desizaun tribunál nian liliu Juis sira mak tetu no deside, ami la ko’alia to’o iha ne’ebá’, afirma nia. (*)