Komandante Sesaun Polísia Tránzitu Munisípiu Dili, Inspetór Polísia, Domingos Sarmento Gama hatete, kazu asidente tráfegu iha fulan-jullu seidauk remata foin tama semana ida rezulta ona ema na’in-tolu mak mate iha estrada públiku.
“Ita dehan fulan-jullu ne’e dala ruma fulan remata ne’e ita konsidera fulan perigozu ba asidente trafégu, tanba foin iha loron hitu (7), de’it ita rejista ona kazu asidente fatál rejulta ema na’in-tolu mak mate iha área juridiku Munisípiu”, informa Domingos, iha nia Kna’ar fatin PNTL kaikoli, kinta (07/07).
Tanba dezastre asidente tráfegu dahuluk iha loron 03 fulan-jullu ida mate iha área Tasitolu besik Postu Tránzitu nian oin karreta ho motorizada, tanba ne’e parte rua konvense simu malu hakarak rezolve família, maibé PNTL kontinua rejista halo autonotisia hato’o ba Ministériu Públiku mak sei prosesu.
Nune’e iha loron 06 jullu akontese kazu asidente tr’afegu ho tipu hanesan envolve karreta ho motoriza iha área Timor Block nia oin dadaun ne’e prosesu la’o hela, maibé parte rua hahú konvense malu rezolve ho dalan família, tanba dezastre ne’e la espera.
“Kazu asidente fatal iha área Timor Block nia oin vítima ida mate ho naran Isac Gusmão konduz motorizada hetan soke iha ulun husi kondutór ho karreta truk ho insial JS, maibé ita akompaña iha prosesu invetigasaun sira hakarak rezolve família ita hanesan ezekutór kontinua hatoo kazu nee ba Ministériu Públiku mak atu foti desizaun”, esplika nia.
Tuir kronolojia kazu asidente tráfegu ne’e akontese envolve karreta ho motorizada ida, bainhira matebian atu ultrapasa, kait karreta monu tama iha karreta nia okos hodi nune’e karreta sama rezulta parte iha ulun rahun.
Tanba ne’e parte família rua hasoru malu ona sira iha dalan atu rezolve família, tuir informasaun parte vítima konkorda simu ona sasán balun hanesan osan atu sosa kaisaun inklui osan balun hodi apoiu iha prosesu funerál nian.
“Ita-nia investigasaun la husik família rua atu rezolve família to’o de’it iha fatin polísia atu rezolve taka ona kazu ne’e seidauk, ita sei kontinua haruka ba Minstériu Públiku kontinua nia prosesu ba tribunál mak sei foti desizaun”, dehan nia.
Kazu krime saida de’it mak akontese, bainhira PNTL halo atendimentu iha prosesu invetigasuan rekolla dadus hotu la’ós PNTL rasik laiha direitu halo desizaun, tanba polísia hanesan ausiliar ida desizaun hotu sei entrega ba Ministériu Públiku hodi proseseu ba tribunál mak foti desizaun ikus.
“Kazu asidente ne’ebé akontese parte investigadór ba terrenu lokál asidente rekolla dadus atu kompleta ita haruka ba Minstériu Públiku tanba sira mak iha kompeténsia atu arkivu ka kontinua ba tribunál ne’e depende Ministériu Públiku’, haktenik nia.
Iha asidente tráfegu ida ne’ebé akontese iha loron 6 jullu kalan iha área Bairru Formosa, besik iha Cruz Vermelha Timor-Leste nia oin iha sidadaun ida iha informasaun katak, ho kondisaun sofre moras mentál hetan soke husi ema estrajeiru ida rezulta mate.
“Vítima ne’e ita seidauk indetifika nia naran, tanba ema ne’e kondisaun moras mentál, maibé ita-nia investigasaun tau de’it vítima nia inisiál X de’it no suspeitu ida estrajeiru orijen husi nasaun Portugal ho naran inisiál CAG, mak konduz karreta hodi soke vítima”, informa nia.
Dadaun ne’e parte Polísia Tránzitu husi investigasaun halo ona indentifikasun ba suspeitu sira no evidénsia hanesan karreta no motorizada husi asidente rua seluk ne’ebé akontese iha área Tasitolu ho Timor Block nian asegura hotu ona iha edifísiu komandu PNTL Munisípiu Dili.
“Ita halo ona identifikasaun ba suspeitu no evidénsia hotu oras ne’e iha ita-nia liman, iha edifísiu tránzitu komandu PNTL Dili, depois ita
ita hein nia prosesu ita kanaliza ba ministériu públiku iha ona rezultadu hafoin ita bele entrega fali ba parte vítima no suspeitu sira”, afirma nia.
Tanba ne’e komandu PNTL husi sesaun Polísia Tránzitu Munisípiu Dili apela ba sidadun hotu iha kapitál Dili atu kuidadu-an bainhira uza transporte tanba iha fulan-Jullu nee konsidera hanesan perigozu ba ema nia vida, tanba iha de’it loron hitu (7) ema na’in-tolu mak lakon vida iha estrada públiku.
“Ita husu motorista sira tenke hadomi imi-nia vida no ema seluk nia vida ne’e importante, ita ema ne’e mate no tohar iha seluk atu troka ita-nia fatin, tanba labele kompara ema ho hanesan sasán kuandu aat ba loja no benkel hadi’a fali ita ema kuitadu mate hotu ona tohar ita mak terus”, dehan nia.
Iha fatin hanesan família Damião Sarmento, husi matebian Isac Gusmão hatete, kazu asidente tráfegu ne’e ema hotu la espera, atu akontese, tanba ne’e ida mate ona di’ak liu ko’alia oinsá mak rezolve família parte rua hamutuk halo prosesu funebre.
“Ohin ami parte rua mai iha Polísia koko konvense malu rezolve família no ami simu malu, tanba buat ida dezastre ne’e ema hotu la espera atu akontese”, deklara nia.
Nune’e matebian Isac Gusmão dadaun ne’e rai ona iha nia rezidénsia-Bebora, tanba matebian konduz motorizada atu ultrapasa karreta truk ida iha área Timor Block nian, hafoin kait ba karreta monu karreta sama iha ulun fatuk rahun.
Matebian mate husik hela fen ho oan na’in-tolu, feto rua no mane ida ikun foin fulan-rua. (*)
