“Tinan ida-ne’e ita planu sei hahú halo rekrutamentu ba membru F-FDTL foun iha fulan-agostu hamutuk ema 600 kadetes”, dehan Filomeno hafoin remata reuniaun ho Primeiru Ministru (PM), Taur Matan Ruak, iha Pálasiu Governu, tersa (05/07).
Iha prosesu rekrutamentu ba membru F-FDTL iha tinan 2021 hahú fó prioridade ba veteranu nia oan, no iha tinan 2022 mós kontinua rekruta veteranu nian oan, atu nune'e seguransa iha Timor-Leste metin no di’ak liu.
“Politikamente ita ko’alia buat veteranu nian oan, kestaun di’ak ita bele ko’alia. Ha’u pesoál sei la ko’alia ema ida nia opiniaun, maibé ha’u ko’alia ha’u-nia opiniaun de’it, kuandu ha’u ko’alia ha’u-nia uma laran, ha’u hakarak ha’u ni’an rain ne'e, ha’u nian oan rasik mak hein para metin no seguru, sei ita politika laiha ne'e ha’u bolu imi hotu, ita hanoin hotu kona-ba ida-ne'e, imi fó took imi-nia opiniaun fali ba ha’u, tau veteranu nia oan iha forsa mak di’ak liu ka, naran tau ema arbiru mak di’ak liu”, afirma nia.
Tanba ne’e , iha fulan-agostu planu halo rekrutamentu foun ba membru F-FDTL na’in 600 ne'e, sei rekruta foun hotu kedas, sei la foti fali sira ne'ebé teste iha tinan 2021 ne'e, tanba sira iha liur hemu tua no halo problema sei la hatene, ho ida-ne'e sei hahú rekruta foun hotu.
“Sira ne’ebé la liu iha tinan 2021 tama de’it ida-ne’e sei la akontese, tanba ne’e ita sei halo rekrutamentu foun hotu keta halo ba sira uluk ne’e ba hemu tua halo problema sai sabraut tama F-FDTL mak ho kondisaun moras ita labele hatene, tanba ita sei hahú rektrutamentu foun hotu kedas halo selesaun se mak liu foin bele tama militar”, deklara nia. (*)