“Ita iha fulan-juñu nia laran ita rejista kazu asidente tráfegu hamutuk 105, mate na’in-ida, na’in-20 kanek grave, ida prosesu iha Ministériu Públiku no na’in-111 kanek kaman iha área juridiku Munisípiu Dili ita halo atendimentu”, dehan Komandante PNTL Munisípiu Dili, Superintendente Xefe Henrique da Costa, iha kaikoli, segunda (04/07).
Husi kazu asidente trafégu 105 ne’e, iha kazu hamutuk 72 mak vítima ho suspeitu sira hakarak rezolve família, maibé Polísia kontinua hato’o auto notísia ba Ministériu Públiku, tanba desizaun atu hakotu problema ne’e Ministériu Públiku (MP) ho tribunál mak bele foti desizaun.
Tanba ne’e, PNTL lei la fó dalan hodi foti desizaun rezolve problema, maibé vítima ho suspeitu simu malu hakarak rezolve família PNTL fasilita halo deklasaun ida parte rua asina sai hanesan evidénsia ida, bainhira to’o tempu ruma Ministériu Públiku (MP), no Tribunál bolu bele lori ida-ne’e sai hanesan akta ida ba parte vítima ho suspeitu.
Ba kazu asidente tráfegu 72 ne'ebé rezolve familiar ne'e, tanba parte rua ne'ebé envolve iha asidente tráfegu simu hakarak rezolve família, maibé prosesu kazu ba Ministériu Públiku (MP) kontinua, tanba desizaun atu hakotu problema ne'e iha Tribunál ho Ministériu Públiku mak bele deside.
“Kazu asidente tráfegu sira ne'ebé akontese kaman parte rua mak ko’alia ba malu hakarak rezolve família la’ós PNTL mak obriga ida-ne'e iha lei la eziste, maibé parte rua ko’alia ba malu hakarak rezolve ita halo deklarasaun parte rua asina bele rezolve, maibé kazu ita kontinua rejista iha Ministériu Públiku”, esplika nia.
Iha parte seluk Komandante Sesaun Polísia Tránzitu Munisípiu Dili, Inspetór Polísia Domingos Sarmento Gama hatete, númeru asidente tráfegu kada fulan aumenta, tanba volume transporte karreta no motorizada iha munisípiu Dili mós aumenta no kapasidade estrada rasik mós kondisaun klot hodi prejudika sidadaun sira konduz transporte la iha konsiénsia ikus mai akontese asidente tráfegu.
“Asidente trafégu ne’e akontese nia kauza, tanba númeru transporte kada loron aumenta, estrada klot pior liután ita-nia sidadaun sira konduz transporte laiha konsiénsia halai ho velosidade ida maka’as lakon kontrolu kondisau transporte ida mak ikus mai grave iha asidente sira ne’e mosu”, dehan nia.
Tanba ne’e husu sidadaun hotu haree ba volume karreta ho motorizada, bainhira halo viajem tenke kontrola nia kondisaun, nune’e bele evita asidente tráfegu, tanba ema ne’e mate iha loja la fa’an, maibé transporte aat bele hadi’a iha ofisina, tanba atu reduz kazu asidente tráfegu ema hotu kontribui ba kuidadu vida importante.
Ba númeru asidente trafégu ne’ebé akontese iha área juridiku Munisípiu Dili ne’e kada loron mínimu liu mak rua (20) loron ida, tanba sidadaun sira konduz transporte sira lakohi kontrola-an iha estrada públiku.
“Asidente trafégu kada loron mínimu ita rejista ne’e mak 20 ona, atu evita loron ida labele akontese hanesan ne'e, ha’u husu favor sidadaun hotu tenke hadomi ita-nia vida ne’e importante viajen ho transporte motorizada ka karreta ne’e tenke kontrola kondisaun hotu”, katak nia.
Entretantu tuir dadus estatistika husi Komandu Jerál PNTL durante fulan lima iha tinan 2022 iha kazu asidente tráfegu ne’e PNTL rejista hahú iha fulan-janeiru 153, fevereiru 147, marsu 196 no abril 139 totál hamutuk 635 kazu asidente tráfegu akontese iha teritóriu Timor laran tomak. (*)
