“Sim ita iha dezafiu barak, primeiru ita haree uluk ba infraestrutura, liliu kona-ba fatin eskuadra sira, ita haree ita-nia eskuadra balun ne'e nia kondisaun grave liu, maibé ita nafatin hala'o servisu hodi asegura estabilidade iha ita-nia rai”, dehan Komandante Henrique, iha Komandu Munisípiu Dili, Kaikoli, kinta (30/06).

Ba dezafiu ne'ebé eskuadra sira iha mak hanesan, eskuadra Dom Aleixo, mesmu ninia progresu lubuk ida halo ona maibé to’o agora seidauk iha konstrusaun no tempu udan fatin ne'ebá ne'e risku.

Iha mós eskuadra Vera Kruz rasik ninia fatin laiha, no dadaun ne'e uza hela fatin iha Komandu Munisípiu ninia ida-ne'e presiza hari’i edifísiu, nomós eskuadra Na’in-Feto nia ne'e fatin kloot no presiza iha moru.

Nune'e mós eskuadra Kristu Rei, ne'e fatin ne'ebé la di'ak, kuandu udan bee nakonu no uma nia plafon sira ne'e mós monu hotu ona. Tanba dezafiu hirak ne'e mak PNTL iha, nune'e tau ona ba prioridade iha orsamentu 2023 nia.

“Ita mós hare kona-ba iha transporte ba ita-nia membru sira servisu, ita hatene katak ita-nia forsa rezerva ekipa ne'ebé mak sempre hatun husi eskuadra hodi responde ba kualquer situasaun, maibé sira-nia transporte rasik mós laiha, ita haree ita-nia parte tránzitu bainhira sira halo pasa revista sempre hetan evidénsia barak, maibé susar para sira atu lori evidénsia hirak ne'e mai iha kantor, ita-nia ema sira ne'e lalin, no sa'e fali motorizada sira ne'e mak prende laiha espellu no sapa matríkula ne'e mai kantor, entaun bainhira ita-nia membru sira mai uza transporte prende nia ne’e ema balun hasai foto hodi dehan PNTL rasik mós la kumpri regra”, esplika nia.

Ho ida ne'e hatudu PNTL nia imajen la di'ak iha públiku, nune'e presiza hetan karreta truk ruma para bainhira halo passa revista hodi prende ne'e bele tula evidénsia sira ne'e mai iha komandu Dili.

Entretantu problema hirak ne'e hato'o hotu ona ba komandu Jerál no Ministériu Interior no sira  rasik hatene kondisaun real ne'ebé mak PNTL iha, maibé ate agora nafatin.

Nune'e ida ne'e sai hanesan obstakulu, maibé ho esperansa iha 2023 mesmu que la rezolvidu hotu maibé pelumenus iha parte balun bele rezolvidu nune'e bele apoiu servisu komandu ninia.

“Husu atu kria kondisaun ba membru sira hodi hala'o servisu, labele ita ezize ita-nia membru sira halo servisu maibé ita la kria kondisaun”, hatete nia. (*)