Tempotimor (Dili)-Komandante Polísia Nasionál Timor-Leste (PNTL) Munisípiu Dili, Superintendente Xefe Henrique da Costa, halo inspesaun ba motorizada hamutuk 39 ne'ebé durante ne'e polísia tránzitu Dili utiliza hodi hala’o servisu.

“Sim, ohin ita halo inspesaun ba transporte ne'ebé PNTL sira uza, liliu iha sesaun tránzitu munisípiu Dili ninia, dahuluk haree kondisaun transporte ne'ebé sira uza motorizada, daruak ita haree ba asesoria sira ba motorizada sira ne'e, datoluk mak chek sira-nia karta kondusaun, no ita halo inspesaun ba motorizada hamutuk 39”, dehan Henrique hafoin a halo inspesaun iha Komandu PNTL, Kaikoli, segunda (27/06).

Iha inspesaun ne’e, konsege identifika motorizada balun aat maibé membru sira rai hela iha uma, no komandu fó ona orientasaun depois de inspesaun, parte administrasaun ho lojistika ba membru sira-nia uma atu nune’e bele tula motorizada ne'ebé aat, lori ba Komandu Dili, tanba sasán Estadu ninian aat tenke para iha edifísiu Estadu.

“Ohin ita halo inspesaun ba motorizada hamutuk 39, e motorizada 39 ne’e la’ós di’ak hotu, maibé iha 8 mak aat tiha, identifika balun iha ona ita-nia fatin, iha tolu mak sei iha membru sira-nia uma no oras tan sira parte lojistika sei ba tula mai ona”, informa nia.

Enkuantu haree mós membru sira-nia karta kondusaun mate tenke ba renova filafali, no sira informa katak formatu iha parte transporte ninia mak laiha, no sira sei prepara karta ida hodi aprezenta ba hodi husu nune'e sira bele renova fali membru sira-nia karta kondusaun ne’e ho lalais.

Inspesaun hirak hanesan ne’e, hahú uluk husi parte sesaun tránzitu ninia, maibé tuir mai sira sei la’o mós ba fali eskuadra nian, nomós sasán sira seluk atu nune’e haree kona-ba kondisaun real fizikamente transporte ne'ebé mak sira utiliza.

“Sim, ita fó ona orientasaun ba sira, agora iha kompaña ida ne’ebé mak hetan ona kontratu husi komandu husi instituisaun PNTL, hahú iha 20 Maiu nia ba kotuk ne’e hadi’a ona, no kontratu ho Kompaña, no husu ba membru sira la presiza ema ida-idak hasai sira-nia osan para halo manutensaun ka halo reparasaun, maibé hato’o pedidu mai iha komandu,  nune'e ita kontinua filafali pedidu ba Komandu Jerál para ita halo manutensaun no reparasaun ba motorizada sira ne’ebé mak aat, ida-ne’e ita husu ona ba sira hodi labele hasai osan mesak atu halo manutensaun ba motorizada sira ne’ebé utiliza”, dehan nia. (*)