Komandante PNTL Munisípiu Dili, Superintendente Xefe Henrique da Costa hatete, durante kalan rua Ekipa Konjunta PNTL Munisípiu Dili hala’o atividade operasaun pasa revista ba transporte karreta no motorizada ne'ebé laiha karta kondisaun movimentu iha tempu kalan.
“Iha kinta no sesta-feira kalan ita halo operasaun konjunta pasa revista motorizada ho karreta ne'ebé mak laiha karta kondusaun halo movimentu livre iha tempu kalan ita konsege prende motorizada 80, ne'ebé dadaun ita asegura hela, tanba sira kontra lei Kódigu Estrada”, dehan Henrique, iha kna’ar fatin komandu PNTL Kaikoli, segunda (20/06).
Transporte motorizada sira ne'e kontra lei Kódigu Estrada movimentu iha tempu kalan laiha dokumentu, motorizada, sapa matrikula, espellu laiha inklui balun uza kanu-resin, tanba ne’e ekipa pasa revista prende no aplika koima sira selu iha banku hafoin bele foti hikas motorizada iha komandu PNTL Munisípiu Dili.
“Atividade operasaun ida ne'e ita la para, kalan kalan ita kontinua pasa revista ba transporte karreta ho motorizada husi sidadaun se de’it mak kontra lei ita hola medida atuasuan atu evita asidente tráfegu inklui arma branka nune’e ema hotu bele movimentu livre no Dili tenke seguru ba ema hotu”, afirma nia.
Iha operasaun kalan PNTL Munisípiu Dili hasoru difikuldade hanesan transporte karreta laiha, bainhira hetan motorizada sira ne'ebé kontra lei Kódigu estrada ne'e, membru polísia sira tenke iha obrigasaun lalin motorizada sira ne'e ida-idak mai iha komandu PNTL Munisípiu Dili.
“Servisu kalan sira ne'e ita iha difikuldade mak ita-nia transporte laiha atu lalin evidénsia motorizada sira ne'e, maibé ita nafatin kontinua ho kbi’it ne'ebé ami iha, no agora ita husu ona Komandu Jerál PNTL atu apoiu transporte ba ita, bainhira iha opersaun kalan ita bele lori evidénsia mai iha ita-nia fatin, hafoin ekipa polísia tránzitu prega multa sira selu iha banku”, esplika nia. (*)