“Ita-nia operasaun ne’ebé mak Komandu Munisípiu Dili iha, liuhusi pasa revista ba transporte, liliu motorizada, ne’ebé apoiu husi Eskuadra Dom Aleixo, Vera Cruz, Na’in-Feto, Cristo Rei inklui eskudara Metinaro, ita konsege hatama reseita ba kofre Estadu hamutuk $32,500.71”, dehan Komandante PNTL Munisípiu Dili, Superintendente Xefe Henrique da Costa, iha kna’ar fatin, Kaikoli, segunda (13/06).
Tanba durante ne’e, PNTL Dili hetan apoiu husi Eskuadra Dom Aleixo, Vera Cruz, Na’in-Feto, Cristo Rei, Eskudara Metinaro no membru PNTL husi unidade sira seluk, sempre halo operasaun iha tempu kalan atu halo pasa revista ba dokumentu motorizada, karreta inklui arma branka.
“Operasaun ne’ebé mak ita halo iha tempu kalan, durante fulan-maiu ne’e ita haree liu ba dokumentu no asesória matorizada nian, kuandu motorista sira lori transporte la ho dokumentu no asesória la kompletu, ita konsidera sira halo ona infrasaun, no iha operasaun ne’e tránzitu Dili fó billete ba sira hodi selu multa”, esplika nia.
Enkuantu motorizada sira ne’e, tránzitu lori ba para iha Komandu Dili, kuandu sira selu tiha multa ne’e iha banku hafoin sira bele ba foti filafali sira-nia motorizada.
Komandante PNTL Munisipiu Dilimós relata totál númeru asidente tráfigu durante fulan-maiu nia laran PNTL Dili konsege rejistu hamutuk 103, ne’ebé ema na’in-rua lakon vida. (*)