“Sim durante loron rua, husi loron 08 to’o 09 fulan-juñu, ita-nia PNTL sira halo operasaun iha kalan, no konsege prende motorizada hamutuk 92”, dehan Superentidente João, iha Komandu Munisípiu Dili, Kaikoli, sábadu (11/06).

Ba atividade operasaun iha kalan ne'e hala’o tanba hetan orintasaun husi komandu Jerál PNTL, nune'e eskuadra haat mak hetan orientasaun hodi halo atividade hamutuk ho Polísia tránzitu sira.

Atividade pasa revista ne’ebé eskuadra eskuadra Dom Aleixo, Na’in-Feto, Vera Crus, no Kristu Rei iha munisípiu Dili no prende motorizada hirak ne'ebé dadaun rai hela iha komandu Munisípiu Dili hodi prosesu tuir lei.

“Motorizada hirak ne'e agora rai iha Komandu Munisípiu Dili, hodi prosesu tuir lei ne'ebé ita implementa, tanba motorizada hirak ne'e balun laiha espellu, laiha kapasete, no balun laiha dokomentu, tanba ne’e ita tenke prosesu tuir lei”, afirma nia.

Ba operasaun kalan ne'e sei kontinua nafatin iha kapitál nasaun atubele asegura sidadaun sira iha sidade Dili bele hakmatek.

“Ita hakarak kontinua nafatin operasaun kalan, tanba ita hakarak sidade Dili ne’e seguru ba ema hotu, se la’e motorizada barrolllu tun sa’e uza kanu resin halo komunidade sira deskansa ladún di'ak”, dehan nia. (*)