Jestór Prinsipál Fundasaun Mahein (FM), Abel Amaral hatete, politika Governu hari’i postu foun hamutuk 25 iha tinan ne'e iha liña fronteira terestre, maibé laiha ekipamentu propiu ba membru UPF sira uza hodi deteta atividade negósiu ilegál.

“Ita bele hari’i postu UPF no rekursu barak ba fronteira, maibé ekipamentu sira sei mukit ha’u hanoin ita labele deteta krime trans nasionál sira hanesan droga, tanba ne’e husu ba Governu tenke investe ekipamentu ba ita-nia UPF sira labele ho de’it manuál mak halo servisu”, dehan Abel iha Kna’ar fatin Bairo dos Grillos, kinta (09/06).

Tanba ne’e, hari’i postu UPF foun koloka membru sira ba halo seguransa iha liña fronteira, labele uza fali manuál halo kontrola krime ilisitu kona-ba droga.

“Ita haree durante ne’e servisu UPF, hamutuk ho Migrasaun, Alfandega sira halo servisu barak liu uza manuál, tanba sira la iha fasilidade ida diak atu halo kontrolu iha odamatan fronteira Timor-Leste nian”, dehan nia.

Tanba ne’e husu ba Governu tenke investe fasilidade ida modernu hodi nune'e fasilita servisu ida di’ak iha fronteira. (*)