Vise Ministru Interiór (MI), António Armindo, husu ba PNTL sira atu kuidadu transporte hirak ne’e, hodi labele estraga bainhira Governu apoiu karreta hirak ne’e ba sira.
“Mais kuidadu ita-boot sira-nia karreta ha’u lakohi rona para ita-boot sira soke tun soke sa’e hanesan foin dadaun ne'e”, dehan Vise Ministru Interiór, António Armindo iha Komandu Jerál PNTL, sesta (03/06).
Maske iha tinan 2021, Governu konsege distribui ona karreta unidade 21 maibé la sufisiente tanba ne’e apoiu tan karreta 29 no kontinua ba oin sei apoiu nafatin karreta atus-ida-resin hodi fasilita Servisu PNTL iha terenu sira.
“Iha tinan kotuk ita distribui ona karreta unida 21 maibé ita haree ba realidade la to'o nafatin ita propoin liuhusi komisaun sira aumenta karreta 90 ona ohin ita simu 29 de’it ba unidade VPU ho tránzitu ne’e ita distribui ba komandu munisípiu sira mai simu direta”, esplika nia.
Maibé la’ós ida ne’e de’it sei iha tan 61 ne’ebé mak distribui hitu ba eskuadra hothotu iha Timor-Leste molok fulan-dezembru ne’e hothotu tenke hetan.
Tanba ne’e, Komisaun Nasionál Arpovizionamentu (CNA) hela no montante husi karreta 29 iha millaun $1.1 no miliaun $3 mak fó sai iha CNA ne’ebé iha Outubru sei distribui tan.
Alende ne’e Komandante Jerál Polísia Nasionál Timor Leste (PNTL), Komisáriu Faustino da Costa, husu ba membru no komandante sira atu uza ho responsabilidade tanba materiál sira ne’e povu no Estadu nian.
“Viaturas ne’ebé ita hotu haree iha ita-nia oin, ita presiza hatene katak sasán povu nian, sasán Estadu nian tanba ida ne’e mak PNTL no membru sira nu’udar ema ne’ebé responsável ne’ebé Empresta uza sasán Estadu nian no sasán povu nian tanba ne’e la’ós komandante sira de’it mai mós motorista sira mós tenke uza tuir regra mak matadalan ne’ebé distribui no uza ba objetivu mak hodi serbí iha nia povu ita-nia komunidade no sosiedade”, dehan nia.
Ba konkursu públiku ne’ebé manán husi ajensia Toyota iha Timor-Leste hodi importa karreta Hilux ida ho folin rihun $34, no totál karreta 29 montante orsamentu hamutuk millaun $1.1. (*)
