Tuir informaasaun ne’ebé www.temotimor.com asesu iha pájina AIFAESA, kinta (02/06) katak, iha Palásiu Prezidensiál Nicolau Lobato, loron 1 Juñu 2022, Ministru Defeza Filomeno Paixão hatete, simu orden husi Primeiru-Ministru, Taur Matan Ruak, atu hasoru Prezidente Repúblika, José Ramos Horta hodi relata kona-ba situasaun ne’ebé la’o iha Ministériu Defeza no FALINTIL-Forsa Defeza Timor-Leste (F-FDTL).
“Ha’u informa ba Señór Prezidente diretiva ministerial de planeamentu militár halo iha 2019, iha ne’ebá hatete hotu, ba iha VIII Governu Konstitusionál nia vigora ne’e ha’u tenke halo saida, iha ne’eba hatete hotu, portantu komesa fó servisu bá diresaun jerál aprovizionamentu, administrasaun finansas, halo servisu ninian, ba diresaun polítika internasionál nian ho kooperasaun nian halo saida. Sira halo servisu saida komesa iha 2018 to’o 2023 tenke aprezenta servisu saida-saida ba Estadu, ha’u labele ko’alia detallu liu, tanba relatóriu eskritu ha’u entrega hotu bá iha Señór Prezidente ona”, dehan Filomeno.
Ba diresaun polítika internasionál ho kooperasaun internasionál, para husu apoiu kooperasaun, kolaborasaun no asisténsia téknika ba nasaun doadór sira 20-resin.
Xefe Estadu husu Ministru Defeza, atu kontinua servisu hamutuk ho nasaun boot sira, liliu Estadu Amerikanu, Estadu Xinés, Estadu Australianu, Estadu Portugués, nune’e haki’ak nafatin kooperasaun hodi haruka nafatin membru sira atu ba estuda iha estranjeiru. (*)
