Login to your account

Username *
Password *
Remember Me

Taur Halo Lansamentu ba Konstrusaun Postu Integradu no Inaugura Postu UPF 2

Dezeñu ba Konstrusaun Postu Integradu no Postu UPF 2, iha Fronteira. Dezeñu ba Konstrusaun Postu Integradu no Postu UPF 2, iha Fronteira. Foto Suplay

Tempotimor (Dili)-Primeiru Ministru (PM) no Ministru Interior, Taur Matan Ruak, halo lansamnetu inaugura Postu UPF (Unidade Patrullamentu Fronteira), TCL 13 no Postu Kaizus Laran, inklui hatur fatuk dahuluk ba konstrusaun Postu Integradu ida ne’ebé lokaliza iha fronteira Mota-Ain.

Tuir informasaun ne’ebé ww.tempotimor.com asesu iha segunda (30/05) katak, iha lansamentu ne'e, akompaña husi Embaixada Austrália iha Timor-Leste, Bill Costello, Ministru Defeza, Filomeno Paixão de Jesus, Vise-Ministru Interior, Antonio Armindo, Superintendente Darren Booy, nu'udar komandante ba Programa Dezenvolvimentu Polísia Timor-Leste (TLPDP) nomós Komandante UPF, Superintendente Euclides Belo.

“Ha’u kontente tanba ita halo postu integradu ne’e hamutuk 6 iha teritóriu Timor laran tomak ho modelu ida de’it no ba tinan ida ne’e ita halo mós esquadra PNTL Komoro Aimutin. Tanba ne’e ha’u mós hakarak agradese ba Vise-Ministru Interior no ekipa tékniku tomak liliu arkitetu Nerio, ne’ebé dezeña modelu ida simplest maibé di’ak hodi uza ba tempu naruk nian tanba fasil halo manutensaun”, dehan Taur Matan Ruak, iha Suku Kova, Postu Administrativu Balibo, Munisípiu Bobonaro.

Projetu konstrusaun ba postu 6 ne'e, Munisípiu Bobonaro halo 2 iha Mota-Ain no Tunubibi, Kovalima 1 halo iha Mota Masin, no RAEOA nian mak 3 ne'ebé halo iha Sakato, Oesilo no Citrana.

Entretantu, projetu ne'e integradu kompletu kedas ho fasilidade ahi, bee no karteira, tanba ne’e agradese ba parseria TLPDP ne’ebé komplementa ekipamentu hirak ne’ebé Governu latau osan maibé sira mak tau osan.

“Governu kompremetidu haforsa kooperasaun ho Austrália hadi’a fatin ba UPF sira hodi konstrui postu iha fronteira sira hotu inklui formasaun, treinamentu no bem estar”, haktuir Xefe Guvernu ne’e.

Ho ida ne’e, alerta ba kompaña Leohara atu garante nia kualidade hodi bele hetan naran di’ak.

“Aproveita parabeniza ba kontratór ne’ebé manán projetu ida ne’e mak husi kompaña Leohara, hanesan timoroan ha’u la ezije buat barak maibé presiza mak tenke garante nia kualidade nune’e ita-nia PNTL sira uza ho kontente no ita -boot sira mós hetan prestijiu no kredibilidade tanba dalabarak ema dehan timoroan kaer ladi’ak buka mak manán lukru deit”, sujere Taur.

Nune’ee lori Governu nia naran hato’o agradese wain ba Governu Austrália nia kontribuisaun hodi kompleta fasilidade balu iha laran

Antes termina, PM Taur Matan Ruak, rekomenda ba kontratór sira atu superviziona wainhira badaen sira kahur masa no husu Ministériu Interior atu kontrola liliu komandante UPF, Euclides Belo, ho ekipa atu halo akompañamentu nune’e bele fó rezultadu di’ak wainhira finaliza obra refere.

Embaixadór Austrália, Bill Costello hatete, sira sei kontinua apoiu nafatin Governu Timor-Leste hodi haforsa seguransa iha liña fronteira sai di’ak liután.

“Agradese ba Ministru Interior, ha’u respeita tebes ba relasaun ida ne’e liuhusi kooperasaun TLPDP no PNTL. Iha ne’e ha’u atu hatete katak objetivu Governu Austrália suporta Guvernu Timor-Leste liuhusi parseria ida ne’e atu PNTL servisu ba komunidade atu halo protesaun ba povu”, deklara Embaixadór Bill.

Ho ida ne’e, kualker maneira hodi servisu ba protesaun liliu ba estabilidade nasaun nian, nia parte kontinua fó apoiu nafatin.

“Ami sei kontinua hametin nafatin relasaun ho kooperasaun di’ak hodi envolve PNTL iha área espesialista kona-ba hasa’e kapasidade feto iha jender PNTL nian, Polísia Komunitária ne’ebé tama ona iha Planu Asaun 2022-2030”, afirma nia.

Ba relasaun di’ak TLPDP ho PNTL la’ós iha konstrusaun de’it maibé iha mós área seluk hanesan fó treinamenetu ba PNTL sira iha área investigasaun no violénsia kontra feto no labarik sira.

Komandante Jerál PNTL, Komisáriu Faustino da Costa hatete, ho postu integradu foun ne’e ema hotu bele servisu hamutuk hodi evita atividade ilegál no aktu ilisitu internasionál atravesa fronteira terestre.

“Seremónia ida ne’e simplest maibé siknifikante tebes PNTL liliu UPF konta ho kolaborasaun husi F-FDTL, ho servisu integradu sira hanesan Autoridade Aduaneira Karantena no Servisu Migrasaun atu asegura povu iha rai ketan ida ne’e hodi kontrola mós sasán ilegál iha fronteira no kombate krime transnasionál”, informa Faustino.

Prezensa UPF iha liña fronteira la’ós sai inimigu ba povu maibe sira-nia kna’ar no responsablidade hodi prevene atividade ilisitu iha fronteira liliu krime transnasionál.

“Atu hato mós katak ita hahú konstrui postu ne’e ho osan Estadu tanba ne’e hakarak agradese ba Vise-Ministru Interior nia esforsu tomak hodi servisu hamutuk ho parseria sira durante pandemia Covid-19 nia laran no ikus mai ita reliza seremónia rua inklui ita inisia hodi hatur fatuk dahuluk ba konstrusaun postu integradu ida ne’ebé implementa husi Orsamentu Jerál Estadu nian”, relata nia.

Ba postu foun tau iha planu Kapitál dezenvolvimentu no koloka iha OJE 2022 liuhusi fundu infraestrutura, hodi konstrui postu fronteira ho kategória permanente nune’e nia husu ema hotu bele tau matan ba postu refere.

“Hato’o ba autoridade lokal nomós komunidade hotu iha fatin ida ne’e katak postu ida ne’e hanesan mós uma ba ita-boot sira, tanba ne’e husu atu servisu hamutuk ho PNTL hodi tau matan nune’e imi-nia oan sira iha fururu mai atubele uza mos fatin ne’e”, dehan nia.

Hafoin seremónia hatur fatuk dahuluk no kontinua tesi fita ba postu foun rua ne’e hetan mós bensaun husi amu lulik no iha biban ne’e halo mós termu entrega postu husi Embaixadór Austrália ba Ministru Interior hodi hatutan ba Komandante Jerál PNTL hafoin entrega tutan ba Komandante UPF, Superintendente Euclides Belo. (*)

Rate this item
(0 votes)
Last modified on Monday, 30 May 2022 15:50
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« December 2022 »
Mon Tue Wed Thu Fri Sat Sun
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31  

Tempo Timor Networks

Online Counter