Adjunta Diretora Jerál Servisu Migrasaun, Inspetora Xefe Adelaide da Rosa hatete, formasaun ne’ebé halo ho objetivu atu kapasita ajente no ofisiál Migrasaun sira oinsá halo ezaminasaun ba dokumentu no fraude.

“Kursu ida ne’e realiza liuhusi kooperasaun servisu entre Diresaun Jerál Servisu Migrasaun ho Adida Migrasaun Austrália liuhusi Embaixada Austrália iha Dili ho objetivu atu hasa’e ita-nia membru sivíl no PNTL sira-nia kapasidade hodi deteta dokumentus falsifikadu no fraude nian mak hanesan pasaporte, kartaun identidade nomós osan falsu sira ne’e”, dehan Adelaide, iha nia kna’ar fatin Ministériu Interior, Vilaverde, tersa (24/05).

Formasaun ne’e, ofisiál Migrasaun sira ne’ebé partisipa mai husi sede sentrál, Postu Fronteiras Rejinál Baukau nomós Reziaun Administrativu Espesiál Oekussi-Ambeno (RAEOA).

“Ida ne’e mós hanesan faze ida hodi halo kontrolu ba dokumentu liliu minimiza dokumentu falsu tama iha ita-nia nasaun liliu haforsa seguransa iha fronteira liuhusi monitorizasaun no kontrola krime organizadu sira”, hatutan nia.

Ba kursu refere realiza iha CFP (Centro Formação Polisia) Komoro, sei hala’o durante loron tolu nia laran hahú hosi 24 to’o 26 maiu 2022, ho instrutór no peritus na’in-2 husi Departamento Home Affairs-Australia. (*)