“Reestruturasaun husi orgánika PNTL ne’e ho objetivu atu adekua ninia kapasidade resposta ba dezafiu nasionál no internasionál atuál, hadi’a kondisaun funsionál no operasionál, iha aliñamentu ho Planu Estratéjiku Dezenvolvimentu tinan 2011-2030, Konseitu Estratéjiku Defeza no Seguransa Nasionál no Programa Governu Konstitusionál VIII nian”, dehan Ministru Prezidénsia Konsellu Ministru (MPKM), Fidelis Manuel Leite Magalhães, iha Palásiu Governu, kuarta (25/05).

Ho revizaun ba Lei Orgánika PNTL ida-ne’e, adota modelu organizasionál ida, tuir ierarkia, integradu ba nível komandu tolu.

“Nível komandu tolu mak hanesan, nível superiór ida, ho kargu Komandante Jerál no hetan apoiu husi segungu (2.º) Komandante-Jerál, nível intermédiu ida ne’ebé hanesan Komandu Operasionál, Komandu Administrasaun no Komandu Pesoál, no nível datoluk, konstitui husi komandu munisipál sira, inklui komandu munisipál Ataúru ne’ebé foin kria, no komandu rejionál Oé-Kusse Ambeno”, esplika nia.

Aleinde ne'e, Prevee mós funsionamentu pozisaun ierárkika ne’ebé hanesan husi komandu rejionál no komandu munisipál sira, Institutu Superiór Siénsias Polisiál no unidade espesiál polísia, ne’ebé sei simu kompeténsia iha área espesialidade polisiál ba nível nasionál. (*)