"Sujere ba sira tenki disiplina, karik sira komete ba hahalok sira hanesan, lanu mak tuda ema arbiru, halo perturbasaun lei regula momós hela, sé mak halo krime tenke responsabiliza perante nia hahalok," dehan Komadante PNTL Baukau, superintendente, António De Sá iha salaun apuramentu Baukau, kuarta (18/05).

Tanba, iha ambitu komemorasaun loron restaurasaun independensia sei iha konsertu muzíka artista ida husi Indonésia ho naran Karen Klaudia, ne'ebé atu anima komunidade iha Baukau.

Alende husi konsertu muzíka, iha mós feira ne'ebé antes iha loron 16 fulan-maiu tinan-2022, grupu sira aprezenta ona sira nia produtu lokál iha resintu adminstrasaun Munísipal atu harame komemorasaun loron restaurasaun independensia.

Komandu PNTL Baukau sei garante segúransa masimu ba loron 20 Fulan-Maiu iha Munísipiu Baukau hodi mantein liután paz no estabilidade, tuir lei no ordem.

"Ita kontinua nafatin diziviliza situasaun segúransa ba aktividade sira ne'e, nafatin hala'o intenziva patrolla, oinsá prevene para komunidade sira nafatin iha situasaun paz no hakmatek nia laran," nia argumenta

Maske, iha Konstituisaun Repúblika Demokrátika Timor-Leste (K-RDTL) difini klaru ona, fó direitu no dever ba kada sidadaun ida atu halo movimentu livre durante la viola lei, maibé la tuir lei sei hetan sansaun.

"Lei ne'e ko'alia kona-ba individu ne'ebé prátika, ita lajeneraliza juventude hot-hotu la'e, maibé sé karik Pedro mak halo, prontu lei ne'e prega ba Pedro, hanesan autordade segúransa hahú kedas husi uma laran," nia afirma

Husu sidadaun sira liu-liu ba Munísipiu Baukau, atu labele konsumu alkolika iha eventu 20 Maiu hodi hamosu, perturbasaun, tuda inklui hasoru asidente, maibé hakarak atu komsumu alkolika, tenke iha uma. (*)