Print this page

Fulan-Haat, PNTL Rejista Asidente Trafégu 635, Mate 23

Asidente karreta privadu soke motorizada ho marka Honda Reposol, momentu balun liuba. Asidente karreta privadu soke motorizada ho marka Honda Reposol, momentu balun liuba. Foto Suplay

Tempotimor (Dili)-Polísia Nasionál Timor-leste(PNTL) rejista kazu asidente Trafégu akontese iha teritóriu Timor-laran tomak hamutuk 635 no mate na’in-23 iha estrada públiku, durante fulan-haat nia laran.

“Husi númeru asidente trafegu ne’ebé akontese iha fulan-haat (4), mak ita rejista hamutuk 635 mate 23 inklui ida horisehik akontese iha área igreja Bekora ida ne’e mak akontese iha Timor-Leste”, dehan Portavoz Komandu PNTL, Superintendente Xefe Armando Monteiro, liuhusi Komferénsia Imprensa iha Kuartel Jerál PNTL, Kaikoli, kuarta (18/09).

Tuir dadus estatistika iha Janeiru to’o iha Abril, durante fulan-haat (4), kazu asidente trafégu kada loron kontinua akontese, tanba falta konsiénsia komunidade sira, bainhira konduz transporte karreta ho motorizada la kontrola nia velosidade hakarak lalais mak ikus mai tenke rejulta asidente balun tenke mate iha estrada públiku.

“Ita-nia lei kódigu estrada númeru 06/2003, parte PNTL husi Departamentu Trázitu Rodaviaria iha nível nasionál to’o iha Munisípiu loron ba loron kontinua halo operasaun no sosializa lei kódigu estrada ne’e ba transporte públiku no komunidade sira, maibé númeru asidente Tráfegu kada loron kontinua akontese aumenta, tanba sira rasik hatene hela lei, maibé laiha konsiénsia”, esplika nia.

Bainhira vita kazu asidente tráfegu sira ne’e, presiza konsiénsia komunidade tomak, tanba komunidade sira mak sai na’in ba estrada públiku hodi halo viajen loron ba loron.

“Kuidadu no salva vida iha estrada públiku, bainhira ita uza transporte karreta ho motorizada ne’e ita la presiza obriga, tanba ita-nia komunidade sira konduz karreta ho motorizada iha estrada públiku presiza foku no konsentrasaun objetivu viajen ba ne’ebé, maibé dala barak akontese komunidade sira la foku no konsetrasaun ida ne’e mak fó risku ba ema nia vida”, hatete nia.

Tanba nee lei kodigu estrada klaru tiha ona no polisia halo ona sosializaun hahu husi nasional too ona baze iha tinan 2003  too agora liu husi dialogu, seminariu no media nasional sita fo sai bebeik ba publiku hodi bele asesu atu kumprende uza transporte viajem iha estrada publiku sira.

Durante ne’e, komunidade barak seidauk hatene konduz motorizada, sira iha osan sosa motorizada ba treinu fali iha estrada públiku hodi prejudika rasik sira-nia vida no ema seluk.

“Ha’u husu konsiénsia ba sidadaun hotu ita ema ne’e moris dala ida, la’ós hanesan transporte karreta ho motorizada ohin soke aat ba ofisiana hadi’a aban ita bele uza fali ida ne’e laiha, tanba ita ema laiha rezerva ida bainhira mate ida troka fali hanesan ita ne’e laiha”, haktenik nia.

Entretantu tuir dadus estatistika kazu asidente tráfegu PNTL rejista iha fulan-janeiru 153, Fevereiru 147, Marsu 196 no Abril 139, tanba ne’e totál hamutuk 635 kazu asidente tráfegu akontese iha teritóriu tomak.

Husi númeru asidente tráfegu 635 ne’e iha kanek todan 144 kanek kaman 679 no mane 23 inklui joven sira horiseik hetan asidente karreta truk tanki tula mina sama belar iha área Bekora nia. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items