Komandu Relasaun Públika PNTL, Superintendente Xefe Armando Monteiro hatete, Timor-Leste sei halo serimónia importante rua, iha loron 19 maiu kalan Investidura ba PR eleitu José Ramos Horta iha Tasi-Tolu no iha 20/05 kommorasaun loron Restaurasaun Independensia Timor-Leste ba dala 20 iha Palásiu Prezidente Repúblika Aitarak Laran, Bairopite, maibé movimentu transporte kontinua la’o livre.
Iha serimónia importante rua ne’e husu ba komunidade sira ne’ebé mai husi Munisípiu iha kapitál Dili hodi partisipa hanesan Timoroan tenke hatudu disiplina ba bainaka importante sira husi nasaun sira seluk ne’ebé mak partisipa iha eventu rua ne’e.
“Ami Polísia apela ba komunidade sira hotu ne’ebé mak sei partisipa iha eventu importante rua ne’e hanesan timoroan no uma na’in tenke hatudu disiplina ba bainaka sira husi estranjeiru”, dehan Armando liuhusi Komferénsia Imprensa iha Kuartel Jerál PNTL, Kaikoli, kuarta (18/05).
Tanba ne’e iha selebrasaun ba serimónia importante rua ne’e, PNTL sei asegura seguransa no hamutuk kolabora ho komunidade sei garante estabilidade no paz.
Iha eventu rua ne’e asuntu balun importante PNTL hodi informa ba públiku kona-ba movimentu tranporte husi parte Oeste no husi kapital viajen ba oeste, polísia sei fasilita viajen ba mai nomós sira ne’ebé mak partisipa iha serimónia iha Tasitolu.
“Ha’u husu ba komunidade sira hotu tenke respeita regra no kolabora ho Polísia hein iha dalan tama sai iha Tasitolu atubele fasilita viajen bele la’o di’ak iha ámbitu selebrasaun invetidura ba PR eleitu José Ramos Horta”, informa nia.
Tanba ne’e komunidade sira ne’ebé mak sei halo viajen ho transporte husi Munisípiu Likisá, Ermera no Bobobaru tama mai iha kapitál Dili, bainhira tama iha pontu entrada Tasitolu tenke kumpri orden PNTL tenke viajen ho disiplina.
“Iha ne’e mak mak ita-nia polísia sira destaka iha ne’eba bele orienta ita atu tama no sai liu husi dalan ne’ebé mak sira hatudu ba ita atu liu, nune’e bele fó espasu ba ita-nia komunidade no bainaka sira atubele partisipa iha eventu importante ne’e tama no sai bele livre”, dehan nia.
Alende ne’e PNTL mos informa katak, iha loron 20 Maiu sei iha serimónia restaurasaun Independénsia Timor-Leste ba dala XX iha Palásiu Prezidente Repúblika Bairopite, tanba ne’e Polísia sei blokei dalan iha área kampu Alor, Mandarin no Bairupite nian.
“Dalan sira ne’e ita sei blokeia hotu tranporte públiku sira orienta halai husi área Tasi ibun tama ba portu Dili no iha Mandarin sei tama husi Palapasu nia tun ba Farol liuhusi tasi ibun inklui Bairopite nia ita taka haruka tranporte labele tun mai atubele evita engarapamentu tranporte sira bele livre movimentu ba mai”, esplika nia.
Maibé kona-ba transporte mikrolete 011 ho 010 ne’ebé viajen tama ba área Tasitolu ida ne’e sei haree ba volume komunidade sira, Polísia sei la impede transporte halo movimentu, maibá tenke kumpri ba regra.
“Transporte Mikrolete rua hanesan 011 no 010 ita la impede sira atu halo movumentu tula pasajeiru sira tama ba ita área Tasitolu nia, maibé ita husu sira mak tenke disiplina kumpri ba regra atu labele halo ingarapamentu”, hatete nia.
Tuir ajende serimónia ba Investidura ba PR eleitu, José Ramos Horta no komerasaun loron restaurasaun Independénsia Timor-Leste ba dala 20 ne’e sei hahú 19 to’o 20 Maiu iha Tasitolu no Palásiu Prezidente Repúblika no partisipa husi bainaka importante husi nasaun sanulu resin-rua (12), ho ema importante sira hamutuk na’in (14).
Ba ajenda ne’ebé fó sai kovite ba bainaka importante sira hamutuk 14 ne’ebé mak sei partisipa mai husi nasaun Portugal, Austrália, São Tome Principe, Guine-Bissau, Indonézia, Cabu Verde, G7+, Singapura, Mozambique, CPLP, Angola no Brazil. (*)