Vise Ministru Interior (VMI), António Armindo hatete, nia parte mai akompaña aprezentasaun preparativu Komandu Jerál Polísia Nasionál Timor-Leste (PNTL) nian ba seremónia, investidura Prezidente Repúblika (PR) foun, José Ramos Horta no Komemorasaun Restaurasaun Independénsia ba dala 20.

“Ohin ita partisipa direita enkontru planu ba seguransa iha hodi asegura seremónia investidura Prezidente Repúblika foun no komemorasaun loron restaurasaun 20 maio ba dala-20 ninian”, dehan nia hafoin remata aprezentasaun planu operasaun ba seremonia investidura Prezidente Repúblika foun no komemorasaun loron restaurasaun 20 maiu ba dala-20, ne’ebé halao iha Timor Plaza, kinta (12/05).

MI kompromete sei apoia PNTL hodi halo seguransa di’ak liu hodi fó susesu ba eventu rua ne’e.

“Ministeriu Interior sei oferese karreta 10 no aumenta tan karreta alugadu hamutuk 40, portantu ita iha transporte sufisiente hela atu membru sira uza hodi halo seguransa durante loron rua iha loron 19 no 20 maiu”, afirma nia.

Aleinde ne'e, nasaun neen mak konfirmadu ona nia ema espesiál sei partisipa seremónia investidura Prezidente Repúblika foun no komemorasaun loron restaurasaun 20 maiu ba dala-20 no balun sei iha hela konfirmasaun hosi Komisaun organizadora.

“Agora dadaun tuir aprezentasaun ohin husi Komandu PNTL iha konvidadu espesiál nain neen, hanesan Governadór Austrália, entidade balun hosi Nova Zelándia, Primeiru Ministru Kambodia, no sira balun tan ne’ebé ha’u la fikza naran, no protokolu seguransa ba entidade sira ne’e preparadu no Komandu maka sei haree ida ne’e”, informa nia.

Komandante PNTL, Komisáriu Faustino da Costa hatete, Komandu Jerál PNTL envolve mós ekipa komisaun organizadora ba seremónia investidura Prezidente Repúblika foun no komemorasaun loron restaurasaun 20 maiu ba dala-20, tanba ne’e mak Komandu PNTL realiza enkotru ho Komandu sira atu aprezenta kona-ba planu operasaun ba seremónia investidura Prezidente Repúblika foun no komemorasaun loron restaurasaun ba dala-20.

“Ohin aprezenta planu operasaun hahú husi chegada alta entidade husi nasaun liur sira ne’ebé atu partisipa seremónia investidura Prezidente Repúblika foun no komemorasaun loron restaurasaun ba dala-20”, dehan nia.

Maske PNTL iha difikuldade maibé PNTL konpremetidu garantia seguransa seremónia investidura Prezidente Repúblika foun no komemorasaun loron restaurasaun ba dala-20, tanba PNTL kuase envolve efetivu sira. (*)