Komandante UPF, Superintendente Euclides Belo hatete, ró peskadór rasik halo transasaun ilegál iha liña fronteira, iha loron (11/05) madrugada, no agora dadaun asegura ona kuartel UPF Nú Badak.
“Horikalan madrugada ita-nia membru Servisu Sekreta halo vizilánsia iha fronteira tasi ibun iha área Manuhaen Balibo nian no prende ró peskadór ida halo transasaun ilegál hamutuk ho evidénsia sira mak hanesan, minarai litru 35 masa hamutuk 12 nomós litru 20 masa 33, entaun totál hamutuk masa 55 mak ita prende”, dehan Komandante Euclides Belo iha Kuartel UPF Nú Badak, kuarta (11/05).
Ba ró peskadór ne'e rasik, membru sira la konsege kaptura sidadaun sira ne'ebé halo transsaun ilegál tanba sira konsege halai tiha wainhira membru sira to'o iha área tasi ibun.
“Agora dadauk na’in ba sasán sei deskuñesidu maibé evidénsia hirak ne'e asegura ona iha Kuartel UPF hodi halo prosesu no buka tuir suspeitu ne'ebe hatama sasán liuhusi dalan ilegál ne'e”, esplika nia. (*)