“Konstrusaun ne'e tama ona ba projetu tinan ida ne'e nian iha fundu infraestrutura, maibé agora ne'e parte tékniku sira halo dezeñu integradu besik hotu ona, portantu remata ona mak sei haruka ba ADN (Ajensia Dezenvolvimentu Nasionál)”, informa Vise Ministru Antonio hafoin enkontru preparasaun seguransa ba Investidura no komemorasaun loron 20 Maiu iha Timor Plaza-Dili, kinta (12/05).
Antes ne'e, Segundu Komandante Eskuadra Kristu Rei, Inspetór Asistente Paulino Carvalho hatete, kondisaun eskuadra Kristru Rei nia kakuluk sira hahú kuak ona, kuandu tempu udan sira hala'o servisu iha de'it udan laran.
“Situasaun eskuadra Kristu Rei gravé tebes, tanba plafon sira dodok hotu ona, no kalen sira kuak hotu. kuandu udan mai ami iha ne'e araska tebes, tanba udan ben tun kedas hosi leten mak to'o mai kraik ami labele halo servisu”, hatete nia.
Banhira udan tun estraga hotu fasilidade servisu nian hanesan komputadór, inklui fasilidade seluk. Maske nune'e, kondisaun sira ne'e lasai obstaklu ba PNTL hodi hala'o sira-nian kna’ar.
“Ami labele haree ba situasaun sira ne'e, ami esforsu kontinua avansa nafatin, banhira komandu no Governu dehan hadi’a edifísiu foun ami prontu atu servisu”, dehan nia.
Enkuantu hatan ba situasaun ne'e, Komandante PNTL Munisípiu Dili, Superintendente Xefi Henrique da Costa hatete, dadaun ne'e eskuadra Kristu Rei sei utiliza hela edifísiu Eis Floresta nian iha tempu Indonézia.
“Agora ita-nian eskuadra uza nafatin ida ne'e, mesmo ho kondisaun ne'ebé mak grave, tanba iha tempu udan sira hela iha udan laran, tanba kondisaun plafon sira tabele hotu ona, la seguru atu nune'e sira bele halo servisu”, dehan Henrique.
Maibé, husu nafatin ba membru sira atu kontinua hala'o servisu hodi servi estadu no nasaun.
“Komandu munisípiu Dili sei aprezenta ba iha Komandu Jerál PNTL, kontinua ba Governu atubele tau atensaun ba eskuadra Kristu Rei nian”, afirma nia.
Ba medida balun husi parte Governu halo ona, mai sukat rai no halo izame ba kondisaun ba rai no hein de’it bainhira mak mai halo konstrusaun ba eskuadra ne'e, maibé eskuadra Don Aleixo, dadaun ne'e hein de'it atu asina kontratu ho kompaña ne'ebé manán ona konkursu hodi halo reabilitasaun. (*)
