“Sim ita ohin enkontru ho komandante Munisípiu ho estrutura eskuadra nian ho mós Ofisiál Polísia Suku (OPS) sira ita fó apresiasaun ba membru sira hotu tanba esforsu tomak ne'ebé mak membru ida-idak halo ita bele fornese seguransa ne'ebé mak di'ak iha periodu kampaña ho mós eleisaun prezidensiál”, dehan Superintende Xefe Henrique da Costa ba jornalista sira iha Eskuadra Kristu Rei, Bekora, tersa (10/05).

Nune'e hato'o mensajen husi Komandu Jerál PNTL hodi hato'o nia apresiasaun ba servisu PNTL durante ne'e kontribui ba kampaña no eleisaun prezidensiál husi primeira to'o segunda volta.

“Hanesan komandante hanesan superior ita hakarak mak apresia hato'o mos sua eselénsia komandu jerál ninian kona-ba ba louva nomós apresia tomak ne'ebé mak sira fó”, haktuir nia.

Iha objetivu seluk ne'ebé mak komandante hala'o bainhira hasoru malu ho membru sira iha Eskuadra Kristu Rei hodi esplika vizaun PNTL Munisípiu Díli ba tinan 2021-2026 nian.

“Segundu ita mós mai halo esplikasaun kona-ba vizaun PNTL Munisípiu Dili 2021-2026 nian neb mak iha prioridade lima iha ne'ebá ita esplika ba ita-nia membru sira atu nune'e sira hatene hodi implementa iha servísu”, dehan nia.

Alende ne'e husu ba membru sira atu kontinua nafatin respeita malu iha serbisu fatin, no hatudu nafatin unidade, tanba kuandu la respeita malu, sei fó implika ba membru sira-nia futuru.

“Ita nafatin husu ba sira atu nune'e hatudu nafatin disiplina nomós respeita malu iha fatin servisu nian, bainhira la unidade ita sei la respeita malu hatene ita bele serbisu ne'ebé mak di'ak ba ita-nia komunidade sira ne'e difísil entaun ita nafatin mai motiva sira nomós fó atensaun ba sira atu nune'e hadook-an husi problema tanba kuandu sira envolve iha problema ita loke prosesu ba sira nune'e nia impaktu ne'e mós ba sira-nia futuru”, hameno nia.

Komandante PNTL Munisípiu Díli sei kontinua vizita eskuadura sira iha Munisípiu Dili hodi hato'o apresiasaun ba membru sira-nia serbisu iha ámbitu kampaña no eleisaun nian. (*)