Diretór Nasionál Prevensaun Konflitu Komunitariu (DNPKK), António Viegas hatete, formasaun ne'e importante ba liderassun Komunitáriu oinsá mak atu rezolve problema bainhira hasoru nia komunidade sira.
“Serbisu ida ne'e hamutuk ho PLAN internasionál oinsá atu haree ba sensivel ba jéneru jestaun hatun emosaun ida ne'e importante tebes ba iha ita-nia polísia ba mós komunidade no mós ita-boot sira hanesan autoridade, tanba polísia no autoridade lokál sira mak hasoru problema iha ita-boot sira-nia komunidade”, dehan nia iha Sede Suku Bebonuk, tersa (10/05).
Tanba komunidade sira iha problema inklui mós lideransa komunitáriu sira mós hasoru problema oinsá atu redúz emosaun, oinsá atu kontrola hodi atende kazu sira ho di'ak.
Bainhira komunidade hamutuk ho líder komunitáriu sira hamutuk bele rezolve problema sira ne'ebé akontese iha suku laran atu nune'e hari’i estabilidade paz iha suku hodi kontribui ba nasaun Timor-Leste.
“Liliu labarik sira inklui vulneravel sira mak mai, oinsá ita bele hasoru tanba ne'e mak matéria ida ohin ne'e importante hodi bele hasoru sira hodi trata sira hanensan”, hatete nia.
Administradór Postu Administrativu Dom Aleixo, Munisípiu Díli, José de Jesus, husu ba autoridade sira tenke simu matéria sira ne'e ho atensaun hodi bele sai bukae ida hodi rezolve problema sira iha suku laran.
“Formasaun ida ne'e ba lideransa hodi bele haree komunidade sira, benefisiu ba ita-boot sira, hodi halo di'ak ba komunidade sira, uza ba atu haree ita-nia komunikasaun sosiál sira ne'ebé mosu barabarak iha ita-nia komunidade sira iha Postu Administrativu Dom Aleixo”, afirma nia.
Tanba ne'e mak Autoridade Lokál sira hahú husi Xefe Suku, Xefe Juventude sira Veteranu inklui mós Ofisiál Polísia Suku (OPS) atu utiliza formasaun ne'e hodi di'ak hodi responde problema iha suku sira.
Kooperasaun DNPKK hamutuk ho PLAN internasionál ne'e durante ne'e kobre ona iha Munisípiu Aileu, Ainaru no Díli, hodi rekolla problema sira iha hanesan Juventude Liga ba organizasaun Arte Marisiál. (*)