“Agora dadaun ita iha resintu palásiu Governu ita haree iha fatin ita hamriik ba ne'e iha sinál Tránzitu destaka iha ne'e katak, proíbidu halo estasionsmentu, bandu atu halo parajen iha ne'e, mais loron ba loron ita-nia sidadaun sira ne'e laiha ida mak iha konsiénsia rasik katak fatin ida ne'e halo parajen”, dehan Inspetór Xefe Domingos Sarmentu Gama ba jornalista sira iha resintu Palásiu Governu, segunda (09/05).

Iha Lei Kódigu estrada artigu 120 ko'alia kona-ba rekézitu atu hetan kartaun kondisaun katak, sidadaun ida tenke matan di'ak, ka la'ós difisiénsia matan, sidadaun ne'ebé normál, nune'e mós ema analfabetu mós labele hetan karta kondusaun.

“Matan aat labele hetan karta kondusaun, segundu psikoijikamente ema normál ema la'ós bulak labele hetan karta kondusaun, e tuir ema la hatene lee no hakerek mós labele hetan karta kondusaun, se ema oin moos ne'e labele para estasionsmentu arbiru”, esplika nia.

Bainhira ema ne'ebé mak halo estasionsmentu arbiru konsidera funisionáriu sira ne'ebé mak para karreta arbiru ne'e Difisiénsia matan.

“uandu iha fatin estasionsmentu mak bandu labele halo parajen mak sira kontra nafatin ne'e, konsidera sira ne'e matan aat, se matan di'ak hela katak sinál bandu labele para, loos ka lae?”. afirma nia.

Alende ne'e funsionáriu sira ne'ebé para arbiru ne'e konsidera analfabetu tanba la hatene lee no hakerek maka ikus mai para arbiru iha fatin bandu sira ne'e, nível ema sira ne'ebé labele hetan karta kondusaun tanba sira para arbiru.

“Sinál iha hela sira (funisionáriu) haree hela mais sira la kumpri siknifika sira ne'e matan aat no ema ne'e la normál no ema ne'e la hatene lee no hakerek pior liután mak iha Palásiu Governu”, dehan nia.

Maske Polísia Nasionál Timor Leste (PNT) kontinua apela liuhusi mídia sira maibé funsionáriu hirak ne'e kontinua kontra regra tránzitu iha área Palásiu Governu nian.

Ba ema sira iha área rurál ne'e kumpri regra maibé funsionáriu sira ne'e kontinua kontra regra hirak ne'ebé mak PNTL hamutuk diresaun Nasionál transporte terrestre (DNTT) fó sai ona.

Nune'e PNTL liuhusi Unidade Tránzitu kontinua preende karreta funsionáriu sira ne'ebé mak para arbiru iha área Palásiu Governu.

Ho hahalok sira ne'ebé mak funsionáriu sira estasionamentu arbiru Polísia Tránzitu lamenta ho hahalok sira ne'e.

“Liliu PNTL Tránzitu lamentavel tebes ema sidadaun di'ak tenke kumpri no tuir lei sira ne’ebé mak ita-nia nasaun estabelese, tanba ninia lei sira, sira la konsidera la respeita ona, fará mais ba rai seluk atu respeita ema seluk nia lei, ida ne'e labele akontese iha nasaun ida ne'e”, deklara nia.

Maske nasaun Timor-Leste opta nasaun Repúblika Demokrátika Timor-Leste labele tolera ho hahalok bandidu sira hanesan ne'e tanba la'ós sidadaun normál.

Tuir observasaun www.tempotimor.com iha terenu haree katak, PNTL liuhusi unidade Tránzitu prende karreta sira ne'ebé mak para arbiru iha área Palásiu Governu hodi bele kumpri regra sira mak aplika ba sidadaun sira ne'ebé mak kontra ka viola lei tránzitu nian. (*)