“Hafoin hetan orientasaun ohin liuhusi Ministériu Interior preokupa no mai atu haree rasik situasaun real iha ne’e. Preokupasaun hirak ne’ebé ohin ha’u rona no haree rasik, ha’u ho reprezentante Komandu Jerál PNTL sei aponta iha ne’e, hodi nune’e bele iha planu ida ne’ebe di’ak. Tanba ita persiza kria kondisaun ne’ebé di’ak liliu infraestrutura ba ita-nia polísia sira”, dehan Antonio Armindo, bainhira vizita Ofisiál Komandu Munisípiu Vikeké, ne'ebé www.tempotimor.com asesu iha kuarta (27/04).

Problema ne'ebé membru PNTL Munisípiu Vikeké ezije atu hetan solusaun mak, kona-ba estatutu pesoál PNTL nia. Tanba iha membru balu laiha ona kondisaun atu halo servisu maibé tanba laiha estatu entaun obriga sira tenke servisu nafatin.

Liuhusi vizita ida ne'e, atu haree besik liután kondisaun ne’ebé membru sira enfrenta no analiza problema hirak ne’ebé iha, ho nune’e, Governu liuhusi Ministeriu Interior bele iha kbi’it atu buka solusaun ne’ebé PNTL Vikeké hasoru.

Tanba daudaun ne'e Governu hahú halo modernizasaun ba PNTL bazeia ba planu prioridade Governu nian mak hadi’a uluk infraestrutura tuir mai rejime salariál ne’ebé aprova ona no daudaun aselera ona prosesu estatutu pesoál.

“Lei sira ne’e ita halo ona lei organika iha mudansa oituan maibé seidauk aprova semana oin bele ko’alia ona. Preokupasaun mak estatutu ha’u ho PM sempre ko’alia sa’e hotu mai mentok tanba kareira metin hela. Estatutu ne’e ita ko’alia dalabarak ona entaun ita kria ona ekipa task force ida kompostu husi asesor legal Ministériu Defeza, Ministériu Interior no PNTL nian hodi aselera lalais no semana oin ita haruka ba PCM (Prezidensia Konsellu Ministru). Agora kona-ba menus rekursu ita-nia PM orienta ona komandu PNTL antes halo planu rekrutamentu tenke buka tuir membru sira ne’ebé identifika hanesan defisiénsia no idade avansadu nune’e bele aprova tuir planu hodi integra iha panorama orsamentál”, esplika nia.

Komandante PNTL Munisípiu Vikeké, Superintendente Sebastião Alves Quintão, haksolok ho vizita ne’e hodi bele motiva di’ak liután membru sira, inklui aprezenta mós progresu servisu no dezafiu ne’ebé durante ne’e sira hasoru ba oinsá bele resolve.

“Ami agradese tebes hetan primeira vizita espesiál husi Vise-Ministru Interior mai iha fatin ne’e. Hanesan komandante ha’u kontente tanba ho vizita ne’e bele fó motivasaun di’ak liután ba membru PNTL Vikeké nian.

Iha ne’e aprezenta mós preokupasaun balu husi membru balu mak kona-ba estatutu pesoál PNTL, tanba membru balu laiha ona kondisaun atu halo servisu maibé tanba laiha estatu entaun obriga sira tenke servisu nafatin.

“Pesoél ne’ebé ho konidasaun tama reforma maibé tenke tauk hela ho estatutu foun. Ida ne’e mak preokupasaun hirak ne’ebé sira ezije mai hau”, dehan Superintendente Sebastião Alves. (*)