“Ha’u haruka ona karta ba PCIC atu buka tuir ema sira ne’ebé gosta lansa informsaun sira iha rede sosiál nune’e prova instabilidade, no dala ida tan ha’u atu dehan ho onestu informsaun sira ne’e la’ós mai husi ha’u”, dehan Vise Minitru Antonio, iha kna’ar fatin, Vilaverde, sesta (22/04).

Tanba ne’e, fó ona orientasaun ba Komandante Jerál PNTL, Komisáriu Faustino da Costa hodi orienta membru PNTL halo seguransa ne’ebé rigor hodi garantia sidadaun sira-nia movimentu tempu kalan.

“Gravasaun sira ne’ebé mak viral los iha loron rua liuba ita rona, iha facebook, ha’u sei Ministru Interior Interinu orinta kedan Komadante Jerál PNTL, monta ita nian seguransa iha fatin ne’ebe mak akontese fatin sira ne’ebé iha gravasaun temi”, informa nia.

Dadaun ne’e, PNTL sira kontinua halo pasa revista iha tempu kalan no loron hodi asegura seguransa no garantia ba komunidade sira-nia movimentu bele la’o livre.

“Ita-boot sira haree kalan kalan iha check point hodi fó seguransa ba sidadaun sira bele sente seguru, nasaun ida ne’e tenke ba oin”, hatete nia.

Tanba ne’e, husu ba públiku labele fiar informasaun ne’ebé espalla iha rede sosiál katak nia hetan orientasaun husi Konsilleiru Superior Partidu KHUNTO, Josá dos Santos ‘Naimori Bucar’ hodi orienta polísia elemina líder nasionál balun.

“Ha’u hanoin informasaun ne’e lalos, iha Timor ne’e ita hatene ona ema gosta inventa informasaun no ha’u atu ko’alia klaru katak informasaun ne’e lalos”, deklara nia.

Ba líder nasionál hanesan Xanana Gusmão, José Ramos Horta, Taur Matan Ruak, Lere Anan Timur inklui líder sira seluk ne’e laiha ema ida merese atu halo buat ruma ba sira, maibé fó seguransa ba sira ho másimu.

“Ha’u la fiar katak ema ida haruka ha’u halo ida ne’e. Ha’u atu deklara ba públiku katak ida ne’e lia falsu, ne’ebé ha’u husu ba públiku labele fiar informasaun sira iha rede sosiál”, afirma nia. (*)