“Dadaun ne'e Ministériu iha ona programa pinta estrada, nomós ba sinál tránzitu sira, liuliu Sumaflo. Ami foin lalais halo ona akizasaun, e buat sira ne'e mai hotu ona, hein atu servisu hamutuk ho PNTL para monta iha fatin hotu”, dehan Diretór Jerál Transporte no Telekomunikasaun, Gaspar de Araujo, iha Tasitolu, kinta (21/04).
Ekipa husi DNTT kontaktu ona ho empreza balun, no hetan ona resposta, iha tempu badak sei halo manutensaun ba Sumaflo hirak ne'ebé la funsiona.
“Ami halo ona kontaktu ho emprezáriu ida, no hein katak tempu badak sei halo manutensaun”, informa nia.
Aleinde ne'e, DNTT Sei instala tan Sumaflo iha fatin tolu hanesan, Delta II (Rotunda Elemloi), Klinika Foho Osan Mean, no Kuluhun.
“Ami mós iha projetu atu instala tan Sumaflo iha fatin tolu, ida iha Delta II, Foho Osan Mean, no Kuluhun”, deklara nia.
Komandante Tránzitu PNTL Munisípiu Dili, Inspetór Xefe Domingos Gama Sarmento hatete durante ne'e públiku preokupa kona-ba Sumaflo sira ne'ebé la funsiona ho di'ak hodi hamosu engrafamentu no asidente.
“Ida ne'e ita-nian preokupasaun hotu, maibé ohin Diretór Ministériu Transporte Komunikasaun (MTK) fó hatene ona katak iha ona prosesu tenderizasaun ne'ebé ita hotu hein”, dehan nia. (*)