Komadante Komandu PNTL Munísipiu Baukau, Superintendente António De Sá, hatete, iha ambitu eleisaun loron 18 fulan-abril tinan-2022 mosu insidente ida iha Suku Lavateri Postu Baguia, rezulta sidadaun ida hetan kanek, tanba taa husi suspeitu deskoñesidu.
Hafoin akontese, parte PNTL Baukau evakua kedas vítima ba Óspital Referal Eduardo Ximenes (HoREX-sigla portugés) hodi halo tratamentu.
Enkuantu kazu refere akontese iha loron 18 fulan-abril tinan-2022 parte kalan, iha Aldeia Ledana, Suku Lavateri, Postu Adminisitrativu Baguia, rezulta vítima Vergílio Guterres Viana idade-55, hetan kanek iha parte ulun (karuk).
"Prosesu ne'e iha hela investigasaun, ita identifika ona autór kuandu iha ona konsensia sadar fila fali sei foti nia depoitmentu halo kapturasaun ba autór," dehan komadante PNTL Munísipiu Baukau iha kna'ar fatin, kuarta (20/04).
Alende ne’e, iha loron 18 fulan-abril tinan-2022, mosu perturbasaun iha sentru votasaun Uaiaka, tanba sidadaun ida ho kondisaun lanu, mosu mós iha sentru votasaun teulale joven sira tuda malu, maibé parte segúransa konsege hakalma situasaun iha tereñu.
"Ita konsege kaptura duni sira, agora iha hela sela eskuadra Baukau vila submete ona ba prosesu," nia hatete
Iha mós insidente ki'ik balun mosu iha Suku Gariauia, maibé la rezulta ema ruma kanek.
"Ne'ebé laiha kazu grave mosu iha segundu ronde," katak António
Enkuantu iha periodu eleisaun segunda volta husi loron 18 to'o 19 fulan-abril tinan-2022, kazu insidente no asidente Komandu PNTL Baukau, seidauk bele fó sai relatóriu ba públiku, tanba kazu sira seidauk tama kompletu iha parte komandu Munísipiu.
Diretór STAE Baukau, Lucio Salvador Freitas, afirma, durante prosesu eleisaun mosu krime eleitóral iha sentru votasaun Uai-aka, inklui votantes ida iha sentru votasaun Kaibada Makasae, maibé parte segúransa konsege hakalma situasaun iha tereñu.
"Kazu sira rezolvidu, sira lori ba kantór Polísia rezolve," Lucio hakotu (*)