Komandante Jerál PNTL, Komisáriu Faustino da Costa hatete, Komandu Jerál PNTL halo formatura Jerál atu husik membru PNTL sira hodi ba destaka iha Komandu Munisípiu  ida-idak bele apoia rekursu ne’ebé sira iha, nune’e bele fó apoia seguransa ba sentru votasaun sira, iha  ambitu eleisaun Prezidensiál.

“Loron ohin ne'e, ita hamutuk iha fatin ida ne’e, atu halo parada ida nu'udar kontinuasaun parada ida ne’ebé ita halao iha loron 17 fulan kotuk liu ba, ne’ebé atu responde ba atividade seguransa eleisaun Prezidensiál 2022-2o27”, dehan Komisáriu Faustino da Costa, iha Kuartel Jerál PNTL, Kaikoli, domingu (17/04).

Apoiu efetivu sira ne’e, bazea ba ezijénsia husi Komandu PNTL Munisípiu nia, liga ba menus rekursu ne’ebé atu apoiu asegura ba sentru votasaun sira. 

“Tanba ne’e, Komandu Jerál PNTL responde kedan ezijénsia husi Komandu Munisípiu no Autoridade Munisípiu sira, ita detaka tan efetivu hamutuk 145, hodi asegura seguransa ba sentru votasaun sira”, afirma nia.

Maibé husu ba membru sira atu hatudu impasialidade, neutralidade, labele favorese ba raz ka grupu no entiku inklui mós relijiaun. Maibé hatudu profisionalizmu nafatin bainhira halo servisu perante misaun PNTL nian tuir konstitusaun RDTL haruka.

Iha ne’e mós kongratula ba membru PNTL sira hotu,  ne’ebé hatudu servisu di’ak perante kampaña no eleisaun Prezidensiál iha primeira volta buat hotu bele la’o di’ak.

“Ha’u hanoin pasu ida ita liu ona, maske iha insidente no asidente, maibé kampaña no eleisaun Prezidensiál ne’ebé liu ona, buat hotu ita la’o di’ak, ha’u agradese ba membru  sira hotu ita hothotu nia servisu”, dehan nia.

Maske iha kampaña eleisaun segundu volta mosu insidente balun, ida ne’e obriga membru PNTL sira atu servisu maka’as liután maibé ho servisu hamutuk  hatudu profionalizmu solidu hotu sei la’o di’ak.

“Ha’u husu ba membru sira kontinua hatudu profionalizmu, rona no simu orientasaun husi Komandu PNTL Munisipiu sira ne’ebe ita-boot sira deztaka ba, nune’e bele fó susesu ba ita-nian eleisaun Prezidensiál  segundu ronde ne’e bele la’o di’ak liután”, hatete nia.

Enkuantu efetivu ne’ebé Komandu Jerál Polísia Nasionál Timor-Leste (PNTL), apoia ba Komandu Munisípiu sira mai husi membru PNTL Sentru Formasaun Polísia (CFP), membru sira husi Kuartel Jerál PNTL nian, Komandu Unidade Espesiál Polísia (UEP), Unidade Polísia Marítima (UPM), Unidade Patroliamentu Fronteira (UPF) no Servisu Migrasaun (SM). (*)