Xefe Estadu Maior Jenerál F-FDTL, Tenente Jenerál Falur Rate Laek, hatete, ohin fó pose ba komadante komponente terestre iha primeiru batallaun Baukau no aban sei kontinua iha komponente Naval no Aero iha Dili.

"Komandu F-FDTL fó ona konfiansa atu lidera komandu komponente ida ne'e ho di’ak no profesionál hanesan ita boot kompromete ona,"dehan Falur Rate Laek, iha primeira batallaun lanud Baukau, segunda (11/04).

Husu kontinua nafatin obra ne'ebé komadante sesante husik hela iha komponente terrestre.

Tanba ne'e, komandu F-FDTL agradese ba komadante sesante buat hotu ne'ebé hala'o ona durante mandatu hanesan kontribuisaun ida ba instituisaun F-FDTL partikularmente iha komponente terrestre.

"Ha'u nia parabens dala ida tán ba komadante komponente terrestre emposadu koronél Trix no parabens ba militár tomak iha komponente terrestre, tanba kontribuisaun di’ak," nia agradese

Nune'e, Komandante sesante komponente terrestre, Renilde Cortereal, hatete, fiar husi Instituisaun F-FDTL lidera komponente terrestre hanesan susesu ida sempre avansa, laiha problema, maibé hasoru dezafiu mak iha situsaun covid-19.

"Komadante foun la’os ema foun, mais orijen kaer komadante kompaña forsa ai-laran kedas nia iha esperensia nia mai hatutan tán nia esperensia kontribui ba komponente terrestre," nia argumenta

Enkuantu, Komadante komponente terrestre, Koronél José da Costa Trix, hatete, tuir posibilidade no kondisaun ne'ebé iha, sei halo tuir ordem husi estrutra komandu nian no lei ne'ebé vigora ona iha Timor-Leste hodi kombate iregularidade atu kaer metin direitu siviku militár nian iha komponente terrestre.

"Ha'u nundar komadante, hanesan mós ba ofisiais ita sei kaer metin pontus importante, luta ba valór ne'ebé presiza, hatutan habelar, maske neneik, maibé bebeik atu dezenvolve komponente terrestre sai forsa ida profesionál," nia hakotu (*)