Tuir informasaun ne'ebé www.tempotimor asesu husi fonte ida iha fatin akontese katak, bainhira bus Luabere halai tama terminal laran atu tula pasajeiru ba Dili, kundotór sira husi karreta bus seluk atake derepente.
Hafoin akontesementu Polísia Nasionál Timor-Leste liuhusi seksaun partollamentu taskforse to’o kedas fatin akontesementu, hodi atua situasaun.
Enkuantu, konfrontu entre motorista ne’e, akontese iha loron 07 fulan-abril tinan-2022 (horseik) pur-volta tuku 12.00 parte meudia, Bus Luabere ho sapa matrikula 36.643 dirasaun Baukau Dili hetan tuda no rejulta vidru janela parte liman los kuaze rahun inklui vidru kotuk.
Alende mós karreta bus marka iha vidru oin Janji Manis, Rau Rau Goza ho sapa matrikuka 37.458 hetan estragus iha parte vidru oin.
Komadante komandu PNTL Munísipiu Baukau, Superintendente António De Sá, haktuir, motivu husi akontesementu ne'e, tanba hada'u malu pasajeiru, alende mós la tuir akordu ne'ebé husi kundotór sira halo.
"Dehan sira tenke kompak para tenke mogok, sira hakarak halo protestu kona-ba presu mina sa'e," dehan Superintendente António De Sá, iha kna'ar fatin, sesta (08/04).
Husi konfrontasaun refere, pasajeiru ida hetan kanek kaman iha parte liman, tanba tuda, nune'e membru PNTL sira lori kedas ba Ospitál Referal Eduardo Ximenes (HoREX-sigla portugés) hodi halo tratamentu.
Nune’e, PNTL Baukau liuhusi PNTL eskuadra Baukau vila kontinua halo prosesu investigasaun ba kundotór sira.
"Tanba de’it bus balun hakarak kontinua nafatin halo operasaun, entaun sira seluk la satisfas konsege baku malu," nia akresenta
Komadante PNTL Munísipiu Baukau esplika ba kundotór sira husi Bus diresaun Baukau Dili, relasiona ho folin kombustivél sa'e, la'os iha de’it Munísipiu Baukau, maibé kuaze mundu tomak infrenta.
Kestaun kndotór husi karreta microlete, bus, mini bus (angunan) ezije hasa'e folin tarefa pasaseiru, parte PNTL aprezenta ona ba Prezidente Autoridade Munísipiu.
Observasaun www.tempotimor.com iha tereñu nota, karreta Bus rua refere dadaun para hela iha eskuadra PNTL Baukau vila, kundotór sira kontinua hein iha Eskuadra PNTL Baukau vila hodi prosesu tuir lei. (*)
