"Númeru asindente tráfiku ba fulan-marsu hamutuk 106, enkuantu husi númeru ne'e na’in-5 lakon vida, kuandu ema na’in-lima mak lakon vida, ne'e númeru boot”, dehan Inspetór Domingos Sarmento Gama ba jornalista sira iha kna’ar fatin, Kaikoli, kuarta (04/06).

Husi númeru ne'e PNTL pasa nota infrasaun ba infratór sira hodi ba selu iha banku, ho totál orsamentu ne'ebé hatama ba kofre Estadu hamutuk $27.520

“Ita kompara infrasaun iha fulan-marsu númeru sa’e maka’as inklui montante koimas iha fulan ida ne'e, ho nominál ne'ebé boot tebes kompara fulan hirak ba kotuk”, informa nia.

Tanba ne’e, Tránzitu Dili halo ona sensabilizasaun direita hodi eduka komunidade, no motorista sira kona-ba sinál tránzitu sira ne'ebé mak estabelese ona iha dalan públiku sira.

“Ita sensabiliza direita iha semana ida ba kotuk, tanba ita haree númeru asidente no númeru ba mortalidade ne'ebé aas tebes kompara ho fulan kotuk ka tinan kotuk”, esplika nia.

PNTL nafatin apela ba sidadaun sira ne'ebé mak uza transporta públiku tenke kuidadu, tanba Dili konsidera númeru transporte sa'e maka’as, fasil mosu asidente.

Haree ba númeru transporte ne'e kada loron sempre aumenta iha Kapitál Dili, tanba laiha kontrolu másimu husi parte kompotente ba komunidade sira ne'e iha osan hodi sosa motorizada no karreta sira.

Husi númeru transporte ne'ebé mak aumenta, ninian konsekuénsia mak hamosu engrafamentu, no hamosu asidente hodi ema lakon vida. (*)