“Kona-ba estatutu PNTL nian ho orgánika PNTL nian, e rejime salariál PNTL nian, ida ne'e sai prioridade ba Governu liliu ba Ministériu Interiór nia programa”, dehan Vise Ministru Interiór, António Armindo, iha Otél Timor, tersa (05/04).

Tanba ne'e, kona-ba lei orgánika ne'e agora dadauk finaliza ona ba Ministériu Prezidénsia Konsellu Ministru (MPKM) distribui ona ba Ministériu sira, no fó ona parasér atubele hein aprovasaun ikus Konsellu Ministru hodi haruka ba Prezidente Repúblika.

Maibé ba estatutu PNTL ne'e seidauk tanba foin dadauk finál tiha, maibé hetan fali pareser legál balun entidade balun entaun fó filafali ba asesor legál sira kompostu husi Ministériu Interiór no Ministériu Defeza (MD) sira-nia asesór legál hodi servisu hamutuk atu haree asuntu.

“Ne'ebé ohin konfirma ona, aban (06/04) sira finál, akomula hotu pareser legál sira ne'ebé mai husi Ministériu ho instituisaun relevante depois hotu aprezenta fali ba Konsellu Ministru”, dehan Armindo.

Ho estatutu ne'ebé mak Ministériu Interiór kria, jatamente sei iha alterasaun ba artigu balun tanba estatutu ne'e lei foun ida ne'ebé mak Ministériu Interiór prepara.

“Kuandu sai ona finál, ekipa asesor sira mai aprezenta ona, depois ita-boot sira mai entrevista fali saida de'it mak hadi'a, e alterasaun, saida mak ita aumenta, saida mak di'ak ba ita-nia PNTL sira ne'e ita sei fó sai kuandu tékniku sira lori ona nia finál mai aprezenta ba ami molok atu lori ba Konsellu Ministru”, esplika nia.

Iha estatutu laran, Ministériu Interiór define mós polítika reforma ba membru sira ne'ebé idade liu 60 ba leten, maibé tanba iha paraser balun ne'ebé mak mai husi instituisaun sira seluk, ne'ebé hein apresiasaun finál husi tékniku sira, iha mudansa ka mantein nafatin.

Bainhira iha mudansa mós sei informa ba públiku no kuandu la mudansa mós sei fó sai, tanba ida ne'e la'ós segredu ida ne'ebé Ministériu tenke rai.

Ba sansaun ba membru sira indisiplina ne'e la prevee iha estatutu, tanba PNTL sira iha ona lei ba indisiplinadu, maibé agora oinsá atu aplika sansaun ba membru indisiplina sira ne'e, depende ba rezultadu investigasaun husi investigadór sira ne'ebé mak halo iha PNTL nia laran.

“Purtantu atu fó sansaun ba membru polísia ida, ne'e haree husi kategória ninia nivél krime ho naksalak ne'ebe nia halo ne'e to'o iha ne'ebé”, hatete nia.

Tanba investigadór sira ne'e sei haree ba tipu krime ne'e, hodi aprezenta ba komandu no konsellu superiór PNTL nian hodi bele haree oinsá mak atu fó sansaun ne'ebé di'ak ba membru refere. (*)