Print this page

Ekipa Konjunta Asegura Sidadaun Estranjeiru Na’in-37 Utiliza Viza Turista

Sidadaun Estranjeitu sira ne’ebé Ekipa servisu kunjunta husi Servisu Migrasaun, IGT, Tributaria, PNSIK no AIFAESA asegura iha área Fatuhada no Hudi Laran Dili. Sidadaun Estranjeitu sira ne’ebé Ekipa servisu kunjunta husi Servisu Migrasaun, IGT, Tributaria, PNSIK no AIFAESA asegura iha área Fatuhada no Hudi Laran Dili. Foto Suplay

Tempotimor (Dili)-Ekipa servisu kunjunta husi Servisu Migrasaun, IGT, Tributaria, PNSIK ne’ebé lidera husi AIFAESA, halao atividade operasaun konjunta no konsege halo kapturasaun ba sidadaun estranjeiru na’in-37, iha área Fatuhada no Hudi Laran Dili tanba uza vistu turista ba halo atividade komersiál.

Komandante Setór Operasaun Servisu Migrasaun, Inspetór Ernesto Maia deklara, sidadaun hirak ne’e kaptura liuhusi operasaun konjunta ne’ebé hala’o durante loron lima nia laran.

“Durante loron lima nia laran ita halo operasaun konjunta hamutuk ho IGT, Tributaria, PNSIK, MTCI ne’ebe lidera husi AIFAESA, tama sai fatin otelária, karaoke no massaje iha Dili laran hodi halo inspesaun ba sidadaun estranjeru sira no konsege asegura sidadaun na’in-37 kompostu husi feto-16, mane na’in-21 no ekipa konjunta lori sidadaun estranjeiru hirak ne’e ba edifísiu Migrasaun, Ministériu Interior, Villaverde hodi submete ba prosesu investigasaun”, dehan Ernesto Maia, iha nia kna’ar fatin Vilaverde, segunda (04/04).

Inspesaun ne’e parte Migrasaun haree liuba pasaporte no violasaun vistu, AIFAESA haree ba presu no data produtu enkuantu MTKI haree liu ba dokumentus lisensa kompaña hirak ne’ebé halo atividade komersiál.

“Sidadaun estranjeiru na’in-37 husi Indonézia, Malázia no Kambodia, agora daudaun ita halo hela prosesu identifikasaun no iha na’in-5 mak seidauk mai aprezenta-an iha sede Migrasaun”, informa nia.

Sidadaun estranjeiru sira ne’ebé viola lei sei aplika sansaun selu multa, maibé sira ne’ebé rekuza nia parte sei submete lista naran sidadaun sira-nian ba Ministériu Públiku atu prosesa tuir lei.

“Agora prosesu investigasaun la’o hela iha fatin imigrasaun nian, ami halo identifikasaun hafoin sei koordena ho Ministériu Públiku (MP) para bele hetan orientasaun tuir mai, karik iha indísiu forte ba prátika tráfiku umanu nian no krime seluk tan”, hatete nia.

Nune'e nafatin apela ba komunidade hothotu atu halo kooperasaun di’ak ho autoridade seguransa karik deskonfia ema balu halo prátika tráfiku umanu nian bele informa lalais ba parte seguransa. (*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items