“Kona-ba sinál sumaflo ka lampu merah ne'e ninia funsaun, ba karreta iha funsaun tolu, kór mean, kinur no matak, agora funsaun ba ema la'o ain, ne'e iha funsaun rua, ita haree imajeni ida mosu iha lampu merah ne'e, funsaun rua de'it mean matak”, dehan Komandnate Tránzitu Dili, Inspetór Domingos Sarmento Gama, ba jornalista sira iha Timor Plaza oin, tersa (29/03).
Tanba funsaun Sumaflo ba ema la'o ain, mak iha oin rua, kór mean fó livre ba ema hodi hakat ba estrada liuhusi zebra cross, no iha imajen ne'ebé mak mosu ema hakat la'o ba mai ne'e siknifika orienta ema atu liu. Bainhira mosu kór mean ne'e fó prioridade ba karreta no motorizada atu liu tanba prioridade ba ema remata ona.
Bainhira komunidade ne'e mak hakat liuba estrada sorin mak la'o la tuir Sumaflo, mak hetan risku rasik.
“Se enkuantu ita korta, ita iha parte ida laloos tanba seidauk iha prioridade ba ema la'o ain mais ita obriga para tenke korta, entaun ita hola risku, tanba ida ne'e mak ita esplika ba ita-nia komunidade sira atu hatene, hodi halo tuir, sensibiliza ba ema la'o rai hodi halo tuir”, esplika nia.
Iha Munisípiu Díli dadaun ne’e, númeru transporte aumenta, nune'e risku ba vida ema la'o rai mós aumenta, tanba ida ne'e mak PNTL iha intensaun atu sensibiliza maibé durante ne'e laiha orsamentu.
“Ha'u hanoin uluk ha'u koordena ona, ami-nia Diresaun Nasionál Transporte Terrestre nomós ami-nia diresaun tránzitu Nasionál maibé razaun katak laiha orsamentu ba sensibilizasaun maibé ba ha'u sensibilizasaun ne'e iha vontade iha bele halo la presiza hein orsamentu”, esplika nia. (*)