Xefe Gabinete Departamentu Jéneru PNTL, Superintendente Julia da Gama, iha loron kinta (24/03) halo vizita integradu ofisiál ida hamutuk ho Institutu Defeza Direitu Labarik (INDDICA) no VPU (Vulnerable Person Unit) Munisípiu Baukau ba uma PRADET (Psychosocial Recovery and Development in East Timor) Baukau ho objetivu vizita bebé ne’ebé ema deskoñesidu soe no komunidade iha Suku Sagadate, hetan bebé mane ne’e ho kondisaun moris, iha loron segunda (21/03/2022).

Bainhira hetan bebé ne’e, komunidade sira informa kedan ba PNTL eskuadra Laga hodi asegura Bebé refere no lori ba PRADET Baukau hodi hetan protesaun.

Ba aktu ne’e, Komandnate Julia Gama kondena maka’as no husu atu komunidade sira servisu hamutuk ho PNTL hodi buka tuir nafatin inan ne’ebé lakohi responsabiliza bebé.

“Komunidade Laga ne’ebé hetan bebé ne’e sai hanesan grasa Maromak nian, maibé tanba de'it moe hodi estraga bebé, ne’e sala boot no laiha morál nu’udar inan ho aman, tanba ne’e husu nafatin ba komunidade sira karik hetan informasaun ruma ne’ebé ligadu ho bebé nia inan husu atu informa lalais mai polísia”, dehan Julia Gama, liuhusi telefone, kinta (24/03).

Bebé mane ne’ebé komunidade hetan fó ona naran Milagrios Soares, tanba iha siknifika ho grasa Maromak nian mak komunidade Suku Sagadate bele hetan nia ho kondisaun moris.

Tuir Julia Gama, konsekuénsia soe bebé ne’e mai husi moris livre, sexuál livre no moe atu iha oan, tanba ne’e nia parte fó hanoin ba joven feto ho mane katak, wainhira hetan oan labele hanoin uluk estraga, tanba mane laiha responsabilide, maibé tenke tur hamutuk hodi buka nia solusaun. (*)