“Dadaun ne’e, fronteira sira Timor-Leste nian ho Indonézia hahú loke ho normál fali ona ba públiku hodi bele ba mai nasaun rua tuir nesesidade, maibé sidadaun sira ne'ebé halo movimentu ne'e tenke iha kartaun vasina, mínimu tenke vasina dalarua ka dalatolu ona”, dehan Komandante UPF, Superintendente Euclides Belo, iha Sentru Formasaun Polísia, Komoro, kinta (24/03).

Desizaun ne’e, liuhusi sirkulár ne’ebé hasai husi ekipa Ministériu Saúde (MS) nian mak iha responsábilidade ba pilár kuatru, mak bele autoriza ema hodi ba mai Timor-Leste Indonézia. Maibé iha pontu rua importante mak sidadaun sira presiza obedese ka halo tuir.

“Primeiru, sidadaun sira bele tama ka sai Timor-Leste, maibé tenke iha kartaun vasina ho mínimu vasina dala-rua ka dala-tolu. Ba sira ne’ebé mak seidauk vasina, iha prosesu ketak ne’ebé mak parte saúde sei foti medida, liliu sidadaun estranjeiru sira ne’ebé mak tama Timor-Leste”, dehan nia.

Bainhira sidadaun la vasina, sei iha mós teste PCR ba sira, tanba tuir sirkulár sira ne’ebé mak fó sai husi responsavel ba pilár kautru nian, katak sirkular ne’e, vale ba pontu entrada hotu ne’ebé iha liña fronteira.

Nune'e UPF nu’udár seguransa ne’ebé fó apoiu seguransa iha lutu fronteira nian, tanba ne'e husu ba sidadaun hothotu ne’ebé mak halo movimentu tama-sai, tenke kumpri regra sira ne’ebé diresaun kompetente sira hasai, hodi bele hatudu katak, ema hotu kumprimenta regra no lei sira mak estabelese ona.

Ba oráriu, odamatan fronteira terrestre entre nasaun rua ne’e, hahú loke iha tuku 09:00 dadeer, to’o 17:00 lorokraik, hodi fasilita sirkulasaun movimentu ema la’o ain no transporte. (*)