Komandante UPF, Superintendente Euclides Belo informa, durante operasaun ne'ebé hala'o iha ámbitu eleisaun nia laran ne'e konsege identifika sidadaun na’in-neen (6) ne'ebé komete iha ilegál crossing.
“Sira halo ilegál crossing ho objetivu tanba kestaun família, no lia mate, lia moris”, dehan Euclides iha Sentru Formasaun Polísia, Komoro, kinta (24/03).
Komandu UPF kontaktu ona Servisu Migrasaun hodi bele foti medida tuir prosedementu legál ne'ebé mak lei migrasaun nian hakerek ona.
“Sim sidadaun na’in-neen ne'ebé mak ita kaptura ne'e, ita kanaliza ba parte saúde nian iha Mota-Ain depois parte migrasaun foti medida tuir grau envolvimentu ba ilegál crossing ne'ebé mak sira komete”, hatete nia.
Ba sidadaun na’in-neen ne'e, UPF halo kapturasaun iha área Maliana, parte Tunubibi nian, no Mota-Ain ho objetivu ne'ebé sira hatete atu ba vizita família tanba kestaun kultura.
“Sira ema Timor, maibé sira iha Kartu Penduduk tanda (KTP) Indonezia nian, depois ita halo prosesu”, informa nia.
Kona-ba atividade negósiu ilegál iha fronteira hahú menus tanba UPF koopera ho autóridade lokál sira hodi halo edukasaun sivika ba komunidade sira iha liña fronteira.
“Negósiu ilegál iha liña fronteira menus tanba UPF hamutuk ho Komandante munisípiu sira, ita servisu hamutuk ho autoridade lokál sira halo edukasaun sivika ba ita-nia sidadaun sira iha liña fronteira nia, nune'e atividade negósia ilegál hahú menus ba dadaun, e nune'e mós durante iha eleisaun nia laran ne'e atividade negósiu ilegál menus liu, tanba sira iha sensibilizasaun”, dehan nia. (*)