Tanba, kontra regra ne’ebé bandu labele dada ona baner, stiker no panflitu bainhira kampaña eleitorál remata ona.
Adminisitradór Postu Adminisitrativu Baguia, António dos Ramos, haktuir, iha loron 18 fulan-marsu tinan 2022 (horseik) parte loraik, vítima na'in-4 tuur hela iha fatin dada espanduk parte dalan diresaun ba Suku Larisula no Alaua-Leten nian (pertigahan), laiha problema ruma, maibé deperente membru Polísia Nasionál Timor-Leste (PNTL) eskuadra Baguia to'o hodi halo asaun hasoru sira.
"PNTL tun ba ne'e, tanba de'it númeru 8 nia poster ne'e iha ne'eba, kampaña ne'e hotu tiha, tanba sá imi tau nafatin poster iha ne'e, ho ida ne'e, entaun sira diskute kona-ba poster ne'e mak Polísia baku sira," dehan António ba www.tempotimor.com via telefone, sabadu (19/03).
Vítima na'in-4 ne'ebé membru PNTL baku, hetan kanek iha parte kakorok, tanba buti no baku mós sira nia isin lolon.
Nune’e, PNTL atu lori vítima na'in-4 ba eskuadra PNTL Postu Bagiua hodi prosesu tuir lei, sira lakohi, tanba la halo problema.
"Polísia sira basa sira, no baku sira, maibé ida kanek mós la'os grave, Polísia atu lori labarik sira ba eskuadra, maibé sira (vítima) dehan, ami lahalo problema, nusá lori fali ami ba eskuadra, ne'ebé Polísia sira fila dehan, kazu ne'e prosesu tuir lei," nia hatete
Maibé, tuir lei Komisaun Nasionál Eleisaun (CNE-sigla portugués) katak, bainhira kampaña husi kandidatu sira tantu husi partidu polítiku no independente remata ona tuir oráriu, CNE tenke hala'o limpeza ba espanduk kandidatu sira iha fatin públiku.
"Realidade la'os iha Baguia de'it, mais horseik ha'u tuir dalan espanduk ho bandeira sira ne'e dada nafatin, ha'u triste envez sira lori CNE mai hatun (espanduk) ou ko'alia didi'ak, maibé halo asaun baku fali labarik sira ne'e, ha'u triste," nia argumenta
Tuir informasaun, membru PNTL ne'ebé baku vítima na'in-4 ékipa task force husi Munísipiu inklui membru PNTL eskuadra Baguia.
To'o notisia ne'e públika, www.tempotimor.com sidauk hetan komentariu husi Komadante PNTL Munísipiu Baukau, Superintendente António De Sá, tanba atu halo konfirmasaun, maibé laiha fatin. (*)
