Ba motorizada sira ne'ebé mak PNTL prende, tanba apoiante ka militante sira kontra sinál tránzitu bainhira tuir kampaña la uza kapasete, la tau asesória motorizada kompletu, inklui mós balun uza kanu resin hodi halo komboiu.
“Operasaun ne'e ita halo ba kandidatu sira ne'ebé mak halo kampaña iha Dili, no ba sira ne'ebé mak la uza kapasete la uza motorizada nia ispellu uza kanu resin ita prende hotu”, dehan Segundu Komadante PNTL Munisípiu Dili, Superentendente João Sancho Pires, iha Rotunda Nicolau Lobato, Komoro, kuarta (16/03).
Kona-ba motorizada sira ne'ebé mak foin prende nia númeru totál lolos seidauk bele fó sai tanba, dadaun ne'e ekipa sei kontinua halo pasa revista to'o orsida loraik kampaña ne'e remata.
Atividade pasa revista iha ámbitu kampaña eleitóral ne’e, Komandu Munisípiu Dili, hetan apoiu seguransa husi Kuartel Jerál PNTL, Unidade Polísia Marítima (UPM), Unidade Patrullamentu Fronteira (UPF), no unidade hotu, hodi halo pasa revista no mós hodi garante seguransa ba iha ámbitu kampaña loron ikus.
Tuir observasaun www.tempotimor.com, motorizada sira ne'ebé mak PNTL prende ne'e maioria apoiante husi kandidatura Fransisco Guterres ‘Lú Olo’, no militante FRETILIN, nune'e hamutuk (60) mak prende ona iha rotunda Prezidente Nicolao Lobato, Komoro. (*)