Ministru Defeza (MD), Filomeno da Paixão de Jesus hatete, ró patrulla seguransa maritima nia ne'ebé Governu Austrália oferese rua ba Timor-Leste sei to’o iha 2023.

“Nune’e ita iha ona ema na’in-60 mak arranka ba tuir treinamentu iha nasaun Austrália kona-ba atu kaer ró patrulla ne’e, ne’ebé dadaun ne’e sira treinu hela, hein tinan oin mai sira arranka mai ho kedas ró patrulla rua ne’e dala ida de’it”, dehan Filomeno, hafoin sorumutu ho Embaisadór Austrália, iha Ministériu Defeza, Fatuhada, segunda (14/03).

Ba Governu Austrália ko’alia kleur ona katak sira mak sei responsavel. Ho esperansa Governu Austrália apoiu ró patrulla rua ne’e sei mai Timor-Leste garante ona seguransa iha Kosta Norte no Kosta Súl.

“Espera katak ita-nia ró ne’ebé mak uluk Xineza oferese mai iha Timor-Leste, ne’ebé iha tinan oin husi Governu Austrália apoiu mai tan ró patrulla rua boot ne’e, maizomenus rua ba Kosta Súl no rua ba norte ne’e kompletu ona”, hatete nia.

Embaisadór Austrália mai Timor-Leste, Bill Costello informa, ró rua ne'ebé Governu Austrália oferese ne'e sei to’o TL iha tinan 2023.

​“Ró rua ne'e sei to’o mai Timor-Leste iha 2023, no los duni ró patrulla rua ne’e kasa kategória, daudaun ne’e treinamentu no ekipa tékniku sira ne’ebé mak atu halo operasaun ba ró patrulla rua ne’e komesa halo prepasaun ona, no ita hein de'it”, dehan nia. (*)