“Em prinsípiu PNTL mobiliza nia forsa hothotu atu apoiu seguransa ba kampaña nia relasiona ho estrada, tránzitu sei atua ho rigurozu ba maluk sira ne'ebé tuir kampaña maibé halo violasaun ba regra tránzitu liliu ita ko'alia kona-ba kódigu estrada nia”, dehan Komadante Tránzitu Nasionál, Superentidente João Belo, iha Postu Tránzitu Tasitolu, tersa (15/03).
Tanba ne'e, husu ba apoiante no simpatizante kandidatu sira-nia, mesmu halo Kampaña maibé nafatin kumpri lei kódigu estrada nia, tenke uza kapasete, labele uza motoriza kanu resin hafoin regra sira seluk ne'ebé regula movimentu estrada nia.
“Hakarak ami la impede ita-boot sira-nia atividade no viajen, di'ak liu kumpri rekejitu sira ne'ebé ami presiza nune'e ita-boot sira-nia atividade relasiona ho kampaña ne'e la'ó ho di'ak”, afirma nia.
Aleinde ne'e, Polísia Tránzitu mobiliza ona rekursu hothotu atu asegura kampaña husi kandidatura hotu la'o ho di'ak prinsipalmente iha Dili.
Entretantu tuir observasaun www.tempotimor.com iha tereinu nota katak, ekipa Polísia Tránzitu Nasionál ho Munisípiu Dili hahú iha postu Tránzitu Tasitolu konsege halo apreensaun ba motorizada balun husi apoiante kandidatu númeru 14, ne'ebe tara hela bandeira Partidu CNRT, tanba viola kódigu estrada. (*)
