Xefe Departamentu Relasaun Publika Komandu Jerál PNTL, Superintendente Xefe Armando Monteiro hatete, Unidade Espesiál Polísia (UEP), Unidade Polísia Marítima (UPM), Unidade Patrolamentu Fronteira (UPF) ne’ebé sei apoiu seguransa iha kapitál nasaun.
“Relasiona ho asidente no insidente ne'ebé akontese iha semana dahuluk no semana daruak ba kampaña eleitorál ne'e, sai ona referénsia no lisaun ida ba PNTL, tanba ita hatene katak efetivu iha komandu PNTL munisípiu Dili hatun hotu ona maibé la sufisiente, nune'e ohin ofisiálmente komandu jerál liuhusi komandante komandu operasaun hasai ona diretiva espesiál ba departamentu servisu no Unidade iha komandu Jerál, sei hatun tan unidade tolu, ne'ebé destakadu iha kapitál Dili ho másimu, hodi asegura seguransa iha loron ikus”, dehan Armando, iha Kuartel Jerál PNTL, Kaikoli, segunda (14/03).
Tanba husi inisiu kedas PNTL garante seguransa ba kampaña no eleisaun ne'e, maibé mós presiza kooperasaun no apoiu husi militante apoiante no simpatizante inklui ekipa susesu kandidatura nia, nune'e garante liután kampaña ikus iha Dili tuir dalan demokrasia.
“Ita hotu tenke kumpri regra no norma prosedimentu ne'ebé mak orgaun eleitorál fó sai tiha ona, atu nune'e ita hotu garantia katak kampaña ikus iha Dili sei la'o ho di'ak tuir dalan demokrasia”, afirma nia. (*)