Nune'e, vítima atu ba hato’o keixa iha eskuadra Polísia Nasionál Timor-Leste (PNTL) Postu Baukau Vila, maibé iha área Tirilolo, hasoru tán asidente karreta baku fila.
Motorista, António Lemos da Silva, haktuir, tula hela pasajeiru husi Postu Adminisitrativu Venilale ba Baukau Vila, maibé derepente grupu deskoñesidu asaltu iha área Kailara.
"Ha'u para, sira mai dehan, sira nia maun alin mate di'ak, nusa mate ladi'ak, entaun sira tuda ami rua ha'u nia alin, ha'u satan netik ha'u nia alin konsege nia ulun kanek, nia hirus matan fatuk kona, ha'u parte ulun ho tán tilun, ain liman, motivu saidá ami lahatene," dehan António ba www.tempotimor.com iha HoREX, sabadu (12/03).
Hafoin asaltu kontinua ho karreta halai hasoru seksaun tranzitu Munísipiu Baukau iha área vila nova PLN, maibé halai liu de'it, tanba intensaun atu ba hato'o keixa ba Polísia eskuadu Postu Baukau vila, maibé la to'o fatin hasoru tán asidente karreta baku fila iha área Tirilolo Baukau.
"Ami rua fó hatene tiha Polísia tranzitu iha PLN, dehan ema tuda ami, atu liu ba eskuadra mak hetan asidente ne'e, iha Tirilolo kuaze tuku 05:45 atu ba tuku 06:00 ona, ha'u sente ulun, tilun, liman ne'e mak ko'alia mós nanal telok, tanba moras," nia hatete
Hafoin akontese asidente, komunidade evakua vítima na'in-2 ba Ospitál Rejionál Eduardu Ximenes (HoREX-sigla portugés) Baukau hodi halo tratamentu no parte segúransa PNTL Baukau mós to'o tuir kedas vítima na'in-2 hodi foti dadus.
"Sira seidauk halo investigasaun no husu tuir de'it nusa mak akontese hanesan ne'e," nia haktuir
Nune'e, familia vítima na'in-2, Tereza Sarmento Neto, husu PNTL atu buka tuir autór ne'ebé halo asaun hodi submete ba prosesu investigasaun, tanba vítima na'in-2 la hatene problema ruma.
"Nia lahatene buat ida, tula pasajeirus mai derepente para karreta baku ha'u nia oan, tuda ha'u nia oan, fatuk karreta laran nakonu hodi sira na'in rua kanek, aiteka laran kailara," nia hatete
To’o notisia ne’e, públika www.tempotimor.com tenta konfirma médiku ne'ebé fó tratamentu ba vítima na'in-2, maibé la fó komenitáriu, razaun servisu barak.
Nune'e mós, www.tempotimor.com tenta konfirma Komadante Komandu PNTL Baukau, superintendente António De Sá liuhusi via telefone, maibé seidauk fó komentáriu ruma, tanba razaun sei tuir hela enkontru.(*)