“Hau hakarak manifesta ita-nia Solidaridade ba povu Ukráina ne’ebé hetan invade husi tropa Rúsia, no lori povu Timor-Leste nia naran husu ba Organizasaun Nasaun Unidas (ONU) atu buka lalais solusaun pasifika ba komflitu ida ne’e, nune’e evita ema mate iha invazaun ida ne’e”, dehan nia liuhusi nia selebrrasaun loron veteranu ‘Importansia hosi Loron Nasionál Veteranus Nian ba Dezenvolimentu Nasionál’ iha Kuartel-Jenerál F-FDTL, Fatuhada, kinta (03/03).

Ba kestaun Rúsia ne'ebé invade Ukráina, Timor-Leste kontra totál bainhira militár sira halo invazaun iha nasaun refere, tanba povu barak mak sofre.

“Timor-Leste nia posizaun kontra totál ba kualker tipu ba okupasaun ne’ebé halo husi militar Rúsia ba nasaun Ukráina, ita kontra ida ne’e tanba lori sofrimentu povu Ukránia sira”, informa Taur.

Timor-Leste hanesan nasaun ne’ebé antes hetan invazaun husi tropa Indonézia, tanba ne’e ho invazaun husi tropa Rúsia hasoru povu Ukráina ne’e Timor-Leste kondena maka’as.

Nune’e mós iha loron tersa (01/03), Primeiru Ministru (PM), Taur Matan Ruak, no reprezentante husi Uniaun Europea (UE), Estadu Unidu Amerika (EUA), Nova Zelándia, Portugál no Fransa junta hanoin ba Rezolusaun Organizasauan Nasaun Unida (ONU) nian kontra agresaun R’usia iha Ukráina.

Iha ekontru ne’ebé PM Taur Matan Ruak, hala’o ho Embaixadór Uniaun Europeia, Andrew Jacobs, Enkaregadu Negósiu Embaixada EUA, Tom Daley, Embaixadór Nova Zelándia, Philip Hewitt no reprezentante hosi Embaixada Portugal no Fransa junta hanoin hamutuk iha kontestu Asembleia Jerál Nasoins Unidas nian kona-ba rezolusaun kontra agresaun militar Rúsia nian iha nasaun Ukránia.

“Ami ko’alia ho Sua Eselénsia Primeiru-Ministru kona-ba situasaun iha Ukránia, ami iha Uniaun Europeia, Nova Zelándia, Estadus Unidus, Portugál, Fransa, ami serbisu hamutuk atu kondena asaun Rúsia nian iha Ukránia iha atake sobre Ukránia husi Rúsia ne’ebé la justu, ami serbisu agora ho Timor-Leste no rai (País) diferente sira iha mundu iha kontestu Nasoins Unidas atu halo rezolusaun forte kondena  Rúsia atu hapara funu agora”, esplika Embaixadór UE, Andrew Jacobs ba Jornalista sira hafoin remata sorumutu ho Xefe Governu, iha rezidensia Farol, tersa (01/03).

Embaixadór Uniaun Europeia ne’e afirma, nia sente kontente ba pozisaun Timor-Leste ne’ebé vizaun idéntika ho Uniaun Europeia, Estadus Unidus Amérika no Nova Zelándia, atu serbisu hamutuk iha kontestu Assembleia Jerál Nasaun Unidas ba halo rezolusaun forte kontra Rúsia.

Tuir dadus ne'ebé www.tempotimor.com asesu iha site www.militarytimes.com, iha loron kinta (03/03) fó sai katak sidadaun Ukránia ne’ebé mate liu ona 2.000 resin. (*)