Komadante Komandu PNTL Munisípiu Baukau, Superintendente António De Sá, hatete, nu’udar jerasaun kontinuadór no autór ba dezenvolvimentu iha responsabilidade masimu hodi kontribui paz ba nasaun Timor-Leste.

"Ha'u nia apela ne'e, espesialmente ba joven, liu-liu joven sira ne'ebé involve aan iha arte marsiál atu hotu-hotu kontribui ba paz no estabilidade, ita nia festa demokrasia ne'e direitu fundamentu povu nian, sira espresa kada tinan-5 ho hakmatek sentimentu segúru, nune'e bele eskolla entidade ida ne'ebé meresa sai aman ba ema hotu iha nasaun, tanba ne'e presiza ambiente ne'ebé hakmatek," dehan nia iha kna'ar fatin Komandu PNTL Baukau, tersa (01/03).

Eventu festa demokrasia agora diferente ho situasaun sira ne'ebé akontese iha tinan-1999, nune'e iha tempu agora la prezisa tuda malu oho malu, tanba sei laiha sentidu moris, tanba ne’e husu joven atu kontribui.

"Horseik (28 fulan-fevereiru tinan-2022) ha'u bolu lider artemarsiais balun fó hanoin ba sira para sai treinadór di'ak ba ita nia alin sira, sai aman karik aman di'ak ba sira, nai ulun karik nai ulun di'ak ba sira," nia hatete

Nune'e, husu sidadaun hotu labele lori sasan kro’at no konsidaun lanu bainhira ba vota iha sentru votasaun, tanba parte seguránsa sei la tolera hodi prosesu tuir lei ne'ebé estabelese ona.

Enkuantu membru PNTL iha Munisípiu Baukau hamutuk 200-resin, sei apoiu tán forsa adisionál husi nasionál, nune'e garante situasaun iha tempu kampañia to'o rezultadu votasaun.

Alende ne’e, durante durante fulan-2 (Janeiru to'o Fevereiru tinan 2022) PNTL Munisípiu Baukau, rejistu kazu asidente no insidente hamutuk 35.

"Kazu asidente no insidente hahú husi Janeiru to'o Fevereiru 2022 ita iha kazu totál 35, ne'e kompostu husi kazu ofensas integridade fizikus okupa primeiru lugár, tuir mak violénsia doméstika, tuir tán dañus (estraga ema nia sasan) tuir tán mak violasaun seksual, kona-ba asidente karreta motor, balun asidente sigúlar ita sei halo rezumu," nia haktuir

Kazu balun aprezenta ona iha Tribunál Distritál Baukau (TDB) no kazu balun ne'ebé lagrave rezolve tuir família iha komandu PNTL Baukau.

Tuir nia, kazu hirak ne'e mosu, tanba problema domin entre joven feto ho mane nian, no feen laen kria problema, tanba ekonomia uma laran.

"Kazu barak liu sira envia mai iha VPU entaun sub-seksaun VPU hamutuk ho redi feto, redi referal sira buka rezolve," nia hatete

Enkuantu kazu asidente no insidente iha Munisípiu Baukau durante fulan-2 nia laran PNTL rejistu, laiha sidadaun ida lakon vida. (*)