Embaixadór Nova Zelándia deklara bainhira hasoru malu ho Vise-Ministru Interior, Antonio Armindo, hodi diskute kona-ba servisu hamutuk ho Ministériu Interior hodi haree ba área seguransa nian liliu dezenvolvimentu PNTL nia.

“Objetivu husi hasoru malu ohin, ko’alia ho Vise-Ministru kona-ba kooperasaun entre nasaun rua, liliu liga ba programa Polisiamentu Komunitária (Polkom) ne’ebé mak Nova-Zelándia atu fó apoiu komesa husi tinan 2022 to’o 2025 no diskusaun ida ne’e atu haree liu prioridade ne’ebé mak importante iha Polísia Komunitária nia laran”, dehan Embaixadór Philip Hewit, hafoin enkontru iha Ministériu Interior, Vilaverde, sesta (25/02).

Governu Nova-Zelándia iha kompromisiu boot ba setór seguransa iha Timor-Leste, hodi kontinua apoiu Polísia Komunitária ne’ebé la’o dadaun ona.

Vise-Ministru Interior, Antonio Armindo agradese, ba apoiu ne’ebé durante ne’e Timor-Leste hetan husi Nova Zelándia tanba kontinua apoiu Guvernu Timor-Leste iha setór seguransa nian.

“Hakarak hato’o agradesimentu ba Governu Nova-Zelándia liuhusi Embaixadór iha Timor-Leste ne’ebé esforsu nafatin hodi apoiu Governu Timor-Leste iha área segurasa nian. Ita hatene katak durante tinan 20 nia laran sira nafatin dezenvolve programa kooperasaun ne’ebé foka liuba polisiamentu komunitária”, dehan Antonio.

Tanba iha semana kotuk, Nova-Zelándia mós asina ona akordu hodi fornese fundu ho Fundasaun Ázia (TAF-The Asia Foundation) atu kontinua servisu hamutuk ho PNTL hodi hadi’a setór seguransa iha Timor-Leste.

Liuhusi lansamentu Planu Asaun Munisípal ba PNTL ne’ebe sai hanesan instrumentu importante ida ba Komandante Munisípiu sira atu kontinua integra Polisiamentu Komunitária nu'udar medida preventiva ida nomós hakbesik-an iha komunidade sira nia leet. (*)